Саясат таануучу Табылды Акеров: Жер шарында бир согуштун артынан башка чоң согуш чыгып кетип жатат, анткени СССР чачырагандан кийин дүйнөлүк саясий тең салмактуулук бузулган. Ошол кезде Збигнев Бжезинский – эми эл аралык мамилелерде АКШ үстөмдүк кылат деп айтса, Генри Киссинджер – Кытай менен Орусиянын дагы кызыкчылыктарын эстен чыгарбаш керек деген. Акыркы жылдары ушул эки көз караш ортосунда атаандаштык болуп жаткандай.

Бул маселени диний карама-каршылык дагы татаалдаштырууда. Жакынкы Чыгышта ислам менен иудаизм кагылышса, Украинадагы согушта католик менен ортодокс христиандар ортосундагы чыңалуу күч. Бул ортодо бардык мамлекеттерди бириктирип, алар ортосундагы маселелерди мунасага алып келе турган Бириккен улуттар уюму да өз алсыздыгын көрсөтүп, аны сөзсүз реформалаш керек экени анык болууда...