Кыргызстанда ЕАЭБге мүчө мамлекеттердин аймагынан товарларды жана транспорт каражаттарын тиешелүү документтери жок өткөрүү үчүн жоопкерчилик күчөтүлдү. Бул тууралуу Мамлекеттик салык кызматы эскертти.

Жаңы талаптар Кыргыз Республикасынын 2026-жылдын 6-августундагы №145 мыйзамына ылайык киргизилип, 21-августтан тартып күчүнө кирет.

Эми товарлардын наркына жараша төмөнкүдөй административдик айып пулдар каралган:

Товардын наркы 500 миң сомго чейин болсо:

• жеке жактарга — 50 миң сом;
• юридикалык жактарга — 100 миң сом.

500 миң сомдон 1 млн сомго чейин болсо:

• жеке жактарга — 100 миң сом;
• юридикалык жактарга — 200 миң сом.

1 млн сом жана андан жогору болсо:

• жеке жактарга — 200 миң сом;
• юридикалык жактарга — 300 миң сом.

Эгерде укук бузуу бир жыл ичинде кайталап жасалса, айып пулдун өлчөмү дагы көбөйөт. Мында товарлардын наркына жараша жеке жактар үчүн 70 миңден 250 миң сомго чейин, юридикалык жактар үчүн 130 миңден 350 миң сомго чейин айып пул салынат.

Мындан тышкары, укук бузуу бир жыл ичинде кайталап жасалган учурда, укук бузуунун түздөн-түз предмети болгон товарлар конфискацияланат.

Мамлекеттик салык кызматы салык төлөөчүлөрдү, ташуучуларды жана транспорт каражаттарынын ээлерин мамлекеттик чек ара аркылуу товарларды өткөрүүдө мыйзам талаптарын так сактоого чакырды.

Ошондой эле товарларга тиешелүү документтерди өз убагында жана туура тариздөөгө өзгөчө көңүл буруу зарылдыгын белгиледи.