Бүгүн, 11-июлда белгилүү дин аалымы, убагында Кыргызстан мусулмандарынын дин башкармалыгын жетектеген мурунку муфтий Чубак ажы Жалиловдун сөөгү кичи мекени болгон Базар-Коргон районунун Бай-Мундуз айылында жерге берилди. Жаназа намазын Кыргызстан Ислам университетинин ректору, Чубак ажынын үзөңгүлөшү Абдышүкүр Нарматов окуду жана ага миңдеген адамдар катышты.

Маркумдун сөөгүн 20:30да коргоочу кийимчен адамдар көтөрүп келишти жана ага башка кишилерди жолотушкан жок.

Сөөк маркумдун жакын туугандары тарабынан апасынын жанына жерге берилди.

Саламаттыкты сактоо министрлиги Жалилов жөнүндө: «Ал 10-июлда түнкү саат 12:00дө оор формадагы эки тараптуу пневмония менен ооруканага жаткырылган. 3-даражадагы дем алуунун жетишсиздиги жана кант диабети менен жабыркаган», - деп маалымат берди.

Эске сала кетсек, 11-июлда түнкү саат 2:50дө 45 жаштагы Ч.Жалилов каза болгон.

Чубак ажы Жалилов 1975-жылы 21-январда Базар-Коргон районунун Бай-Мундуз айылында мугалимдин үй-бүлөсүндө туулган. 1996-жылы Кыргызстандагы Ислам университетин бүтүргөн. Жусуп Баласагын атындагы Кыргыз улуттук университетинде араб тилинен сабак берген. 2000-2006-жылдары Сауд Аравиядагы Эл аралык "Умм ал-Кур" университетинде жогорку билим алган.

Булак: NazarNews.kg