Өзбекстан Республикасынын президенти Шавкат Мирзиёев Түрк мамлекеттеринин уюмуна мүчө өлкөлөрдүн делегация башчылары менен бирге Түркстан шаарынын тарыхый-маданий борбору менен таанышты. Бул тууралуу president.uz жазып чыкты. 

Жогорку даражалуу коноктор Борбор Азиядагы ислам архитектурасынын эң улуу эстеликтеринин бири жана Казакстандын башкы руханий символу — Ходжа Ахмад Яссауи күмбөзүнө барышты.

Лидерлер улуу суфий акын жана ойчулдун элесине таазим кылышты.

Делегация башчылары ошондой эле «Хазрет Султан» музей-коругунун визит-борбору менен таанышты. Бул жерде келгендерди кабыл алуу, көргөзмөлөрдү өткөрүү жана Түркстандын бай тарыхый-маданий мурасын таанытуу үчүн заманбап шарттар түзүлгөн.

Эске салсак, XIV кылымдын аягында Амир Темурдун буйругу менен курулган бул күмбөз бүгүнкү күндө ЮНЕСКОнун Дүйнөлүк мурастар тизмесине кирет жана Орто кылымдардагы ислам архитектурасынын Борбор Азиядагы эң көрүнүктүү эстеликтеринин бири болуп саналат. Анын курулушу 1389–1391-жылдары башталып, XIV кылымдын аягына чейин уланган. Комплексти курууга Орто Азиянын усталары менен катар башка аймактардын да уста-архитекторлору жана кооздоочулары катышкан.

Борбордун өзгөчө бөлүгүн «Сейрек экспонаттар залы» түзөт. Бул зал орто кылымдар доорунун уникалдуу мурасын сактоо, изилдөө жана жайылтуу максатында туруктуу музей экспозициясы катары ачылган.

Экспозицияда Ходжа Ахмад Яссауи күмбөзүнө байланышкан сейрек тарыхый буюмдар көрсөтүлгөн. Алардын арасында XIV–XV кылымдарга таандык түп нускалар, орто кылымдык декоративдик искусство, керамика жана архитектуралык жасалгалар бар. Ошондой эле күмбөздүн түп нуска эшиги, Ходжа Ахмад Яссауинин сөөгүнө коюлган жабуу, Амир Темур тарабынан белекке берилген коло шам чырактар жана Түркстандын байыркы тарыхын ачып берген археологиялык табылгалар да орун алган.

Белгиленгендей, мындай тарыхый эстеликтер жана маданий долбоорлор руханий мурасты сактоодо, тарыхый эс-тутумду бекемдөөдө жана жалпы тамыры, ишеними жана салттары бир боордош элдерди жакындатууда маанилүү роль ойнойт.