Кыргызстанда аз камсыз болгон жана жакыр үй-бүлөлөрдү колдоого багытталган «Социалдык контракт» программасы уланууда. Программага талаптарга жооп берген үй-бүлөлөр катыша алат.

Эмгек, социалдык камсыздоо жана миграция министрлигинин маалыматына ылайык, социалдык контракт түзүү үчүн үй-бүлө аз камсыз болгон же жакыр үй-бүлө статусун ырастаган документке ээ болушу керек.

Бул социалдык паспорт же «үй-бүлөгө көмөк» жөлөкпулун алуу тууралуу маалымат болушу мүмкүн.

Мындан тышкары, жаран программага катышууга макул болуп, бизнес-планын тапшырышы жана эмгек жана мүлктүк потенциалга ээ болушу зарыл.

Программага катышууну каалагандар жашаган жериндеги жергиликтүү өз алдынча башкаруу органдарына же Эмгек министрлигинин аймактык башкармалыктарына арыз бере алышат.

Үй-бүлөлөрдү тандоо социалдык маселелер боюнча комиссия тарабынан жүргүзүлөт. Катышуучулар жана алардын бизнес-пландары атайын комиссия тарабынан бекитилет.

Өтүнмө жактырылгандан кийин үй-бүлөгө өз алдынча ишкердикти баштоо үчүн 150 миң сом өлчөмүндө кайтарымсыз каражат берилет. Программага катышуу ыктыярдуу.

Мындан тышкары, жыл сайын социалдык контракттын 1000 катышуучусуна бизнесин өнүктүрүү үчүн пайызсыз насыя алуу мүмкүнчүлүгү берилет.

Насыянын көлөмү 200 миң сомго чейин, мөөнөтү үч жылга чейин. Каражатты ишкердикти же социалдык контракттын каражатына мурда түзүлгөн көмөкчү чарбаны кеңейтүүгө жумшоого болот.

Пайызсыз насыялар «АБанк» жана «Элдик Банк» аркылуу берилет.

Насыя алуу үчүн катышуучу ишкердик жүргүзүп жатканын тастыктаган документти — ОсООнун же жеке ишкердин мамлекеттик каттоо тууралуу күбөлүгүн же патентин тапшырышы керек.