Акыркы жылдары дүйнө жүзүндө аба ырайы кескин өзгөрүп, климаттык тең салмактуулук олуттуу бузулууда. Бир аймакта аптап ысык күчөсө, башка жерде катуу жаан-чачын, сел, суу ташкындары, бороон-чапкындар жана кургакчылык көбөйдү. Адистер мындай көрүнүштөр климаттын глобалдык өзгөрүшү менен түздөн-түз байланыштуу экенин белгилешет.

Европада жана Азияда рекорддук ысыктар катталып, Африкада узакка созулган кургакчылык миллиондогон адамдарды таза суу жана азык-түлүк тартыштыгына алып келди. Америка континентинде токой өрттөрү менен катар катуу бороон-чапкындар жана селдер кадимки көрүнүшкө айланып бара жатат.

Кыргызстан да климаттык өзгөрүүлөрдүн таасиринен четте калган жок. Акыркы жылдары өлкөдө жазгы жана жайкы мезгилдерде катуу жаан-чачындан улам сел, жер көчкү жана суу ташкындары көп катталууда. Ал эми айрым аймактарда кургакчылык күчөп, сугат суусунун тартыштыгы айыл чарбасына олуттуу зыян келтирүүдө.

Адистердин айтымында, мөңгүлөрдүн тез эриши Кыргызстан үчүн өзгөчө коркунуч жаратат. Мөңгүлөр — өлкөнүн негизги суу булагы. Алардын көлөмүнүн кыскарышы келечекте дарыялардын суусунун азайышына, энергетика жана айыл чарба тармактарында олуттуу көйгөйлөрдүн жаралышына алып келиши мүмкүн.

Мындан тышкары, аба ырайынын кескин өзгөрүшү калктын саламаттыгына да таасир этүүдө. Аптап ысыктын көбөйүшү, абанын булганышы жана суу сапатынын начарлашы жүрөк-кан тамыр, дем алуу жана жугуштуу оорулардын көбөйүшүнө шарт түзүүдө.

Эксперттердин баамында, климаттык өзгөрүүлөр Кыргызстан үчүн узак мөөнөттүү стратегиялык чакырык болуп саналат.

Эгерде суу ресурстарын башкаруу, экологиялык коопсуздук жана айыл чарбасын адаптациялоо боюнча чаралар көрүлбөсө, климаттык коркунучтар социалдык жана экономикалык туруктуулукка түздөн-түз таасир этиши мүмкүн. Айрыкча, айыл жергесиндеги калкка бул көрүнүш өтө опурталдуу.

Адистер Кыргызстанда суу сактагычтарды жана ирригация системаларын модернизациялоону, сел жана жер көчкү коркунучу бар аймактарда алдын алуу иштерин күчөтүүнү, экологиялык таза энергия булактарын өнүктүрүүнү, калкты климаттык коркунучтарга даярдык керектигин бир нече жолу айтышып келет.

Климаттын кескин өзгөрүшү — бул бир гана экологиялык эмес, экономикалык жана улуттук коопсуздук маселеси. Кыргызстан үчүн азыртан чара көрүү келечектеги олуттуу жоготуулардын алдын алуунун жалгыз жолу болуп саналат.