Шайлоо жана референдум өткөрүү боюнча борбордук комиссия (БШК) 2027-жылдын 27-январына дайындалган Кыргыз Республикасынын Президентин кезектеги шайлоодо шайлоо алдындагы үгүткө катышууну каалаган жалпыга маалымдоо каражаттарын жана интернет-басылмаларды аккредитациялоого арыздарды кабыл алууда.

Арыздарды берүүнүн акыркы мөөнөтү — 2026-жылдын 14-октябры.

БШКнын маалыматына ылайык, ЖМКлар жана интернет-басылмалар аккредитациядан «Шайлоолордо ЖМКларды аккредитациялоо» автоматташтырылган маалыматтык тутуму аркылуу өтүүгө тийиш.

Аккредитация үчүн төмөнкү документтер талап кылынат:

• шайлоо алдындагы үгүткө катышууга даяр экендиги жөнүндө арыз;

• ЖМКны Кыргыз Республикасынын Юстиция министрлигинде каттоо жөнүндө күбөлүктүн көчүрмөсү;

• интернет-басылмалар үчүн юридикалык жакты мамлекеттик каттоо жөнүндө күбөлүктүн же жеке ишкерди каттоо тууралуу документтин көчүрмөсү;

• маалымат же маалыматтык коммуникациялар чөйрөсүндөгү ыйгарым укуктуу мамлекеттик орган берген уруксат берүүчү документтердин көчүрмөсү;

• уставдын көчүрмөсү, эгерде бар болсо;

• эфир убактысын, басма аянтын же интернет-басылмада жарыялоо укугун бергени үчүн төлөмдүн өлчөмү жана башка шарттар тууралуу күбөлөндүрүлгөн маалымат.

БШК белгилегендей, эфир убактысы же басма аянты үчүн төлөмдүн өлчөмү бардык саясий партиялар жана талапкерлер үчүн бирдей болушу керек. Ошондой эле ал шайлоо дайындалган күнгө чейинки алты айдын ичинде белгиленген нарктан ашпоого тийиш.

Мыйзамдарга ылайык, шайлоону маалыматтык камсыздоо шайлоочуларга маалымат берүүнү жана шайлоо алдындагы үгүттү камтыйт. Анын негизги максаты — жарандардын аң-сезимдүү жана эркин эрк билдирүүсүн, ошондой эле шайлоонун ачыктыгын камсыз кылуу.

ЖМКлар жана интернет-басылмалар документтерди белгиленген мөөнөттө автоматташтырылган маалыматтык тутум аркылуу тапшырышы керек. Документтер кагаз түрүндө же БШКнын маалыматтык камсыздоо секторунун электрондук дареги аркылуу кабыл алынбайт.

Арыздарды БШКнын расмий сайтындагы «ЖМКны аккредитациялоо» бөлүмү аркылуу берүүгө болот.

Кошумча маалымат алуу үчүн телефон: 66 54 52.