Жалал-Абад облусунун Базар-Коргон районунда үй-бүлөгө каршы каракчылык жасалды. Бул тууралуу жергиликтүү ММКлар өздүк булактарга таянып жазып чыкты.

Маалыматка караганда, белгисиз адамдар түн ичинде унаа тетиктерин саткан, Арстанбап айыл-аймагынын тургунунун үйүнө кирип барышкан. Кол салгандар ишкерди, анын аялын жана 24 жаштагы уулун байлап салышкан. Коркутуп, бардык баалуулуктарды берүүнү талап кылышты. Акчаны алып, белгисиз тарапка качып кетишкен.

Жалал-Абад облустук Ички иштер башкармалыгынын басма сөз кызматы маалыматты тастыктады. Маалыматка ылайык, 7-августта саат 03:00 чамасында бет кап кийип жүргөн үч белгисиз адам Арстанбап айылынын 63 жаштагы тургунунун үйүнө кирип барып, тоноп кетишкен. Кол салгандар, алдын-ала маалыматтар боюнча, 25-30 жаштардагы адамдар. Алар үй-бүлө мүчөлөрүн сабап, курал менен коркутушкан. Натыйжада, алар кассадан 200 миң сом алып кетишкен.

Окуя болгон жерге Базар-Коргон райондук ички иштер бөлүмүнүн кызматкерлери келишкен. Материалдар Кылмыштардын жана жоруктардын бирдиктүү реестрине Кылмыш-жаза кодексинин 202-берене (“Каракчылык”) боюнча катталып, сотко чейинки өндүрүш башталды. Жабырлануучуларга соттук-медициналык экспертиза дайындалды.

Булак: NazarNews.kg