Украина жылдын аягына чейин Европа Биримдигинен кошумча 1 миллиард евро (1,2 миллиард доллар) сурап жатат. Бул акча АКШнын курал-жарактарын сатып алууга жумшалат, деп билдирди РБК.

Украинанын НАТОдогу элчиси Елена Гетманчук европалык өлкөлөр тарабынан каржыланган жана АКШ курал-жарактарын сатып алууну караган PURL программасынын үзгүлтүксүз иштеши үчүн жаңы салымдар керек экенин айтты. Ал уланып жаткан тынчтык сүйлөшүүлөрү Украинага жардамды азайтуу же Орусияга кысымды азайтуу үчүн сигнал катары кабыл алынбашы керектигин баса белгиледи.

Дипломаттын айтымында, Patriot зениттик-ракеталык системаларын жеткирүүнүн 75 пайызы жана башка абадан коргонуу системаларынын 90 пайызы 2025-жылдын жайында башталган PURL демилгеси аркылуу каржыланган. PURL алкагында Украина ар бир жолу болжол менен 500 миллион долларлык аскердик жардам пакеттерин алат деп күтүлүүдө.

Маалымат үчүн, ноябрь айынын ортосунда Украина үчүн 28 пункттан турган тынчтык планы сунушталгандан кийин, АКШнын президенти Дональд Трамп Украинага жеткирүү үчүн НАТО өлкөлөрүнө көп сандаган курал-жарак сатылып жатканын билдирген.

АКШнын НАТОдогу туруктуу өкүлү Мэттью Уитакер ошондой эле Европа Биримдигинин өлкөлөрү алдыдагы айларда Украинага жеткирүү үчүн дагы 2 миллиард долларлык америкалык курал-жарак сатып алууну пландап жатканын айтты.

Эске салсак, мурда Украина Германиядан Patriot зениттик-ракеталык системаларын алганы кабарланган. Украинанын президенти Владимир Зеленский аба соккулары Путиндин бул согуштагы негизги куралы бойдон кала берерин, анткени ал жердеги максаттарына аба аркылуу жете албагандыгын "компенсациялоого" аракет кылып жатканын айткан. Зеленскийдин айтымында, абадан коргонуу системасын күчөтүү согуштун аягын жакындатып, Орусиянын аба соккуларын улантуу мүмкүнчүлүгүн азайтат.

Камила Кабилова, Ташкен