АКШ президенти Дональд Трамп Россияга жаңы ультиматум жарыялашы керек, ал орус лидери Владимир Путинди Владимир Зеленский менен сүйлөшүүгө отурууга аргасыз кылат деп Politico басылмасынын башкы саясий баяндамачысы Жонатан Мартинге таянып  РИА НОВОСТИ жазып чыкты. 

«Трамп мөөнөт коюп турууну жакшы көрөт, эмнеге жайда кылгандай дагы бир ультиматум сунуштабасын? Эгер Путин 15-сентябрга чейин сүйлөшүү столуна отурбаса  анда Россияга жаңы санкциялардын толкуну түшөт», — деп макалада айтылат.

Журналисттин айтымында, кесепети сөзсүз боло турган коркунуч болмоюнча мындай жолугушуу ишке ашпайт. Ошону менен катар, Мартин бул жолу санкциялык коркутуу иштеши керек деп эсептейт, анткени бул толук көлөмдөгү экинчи даражадагы санкциялар болот.

Бүгүн буга чейин Россиянын тышкы иштер министри Сергей Лавров Владимир Путин Владимир Зеленский менен жолугууга даяр экенин, бирок эң жогорку деңгээлде талкуулоону талап кылган бардык маселелер алдын ала так иштелип чыгышы керек экенин белгилеген.

Москва бир нече ирет белгилегендей, өлкө Батыш акыркы жылдары киргизип, улам күчөтүп жаткан санкциялык басымга туруштук бере алат. Президенттин басма сөз катчысы Дмитрий Песков белгилегендей, Россия санкцияларга каршы «иммунитет» калыптандырды. Өз кезегинде, Россиянын ири экономикалык өнөктөштөрү — Кытай, Индия жана Бразилия  АКШнын санкциялык коркутуулары аларды Россия менен кызматташууну токтотууга мажбур кылбай турганын айтып келишет.