Нью-Йорк шаары демократиянын сыноо майданы болобу?

Журналист: АЙСУЛУУ ТАЛАНТ

10.11.2025, 20:54

6688

дүйнө жүзүндө

АКШ дагы бир жолу демократиянын чыныгы маңызын сынаган учурду баштан өткөрүп жатат. Себеби Нью-Йорк шаарында Улуттук гвардиянын киришине даярдык жүрүп жатканы кызуу талкуу жаратты. Бул жөн гана коопсуздук чарасы эмес, аймактык өз алдынчалыкка болгон аракетке карата федералдык бийликтин мамилесин чагылдырат.

Президент Дональд Трамптын “кылмыштуулукка каршы күрөш” деген ураан астында Улуттук гвардияны ири шаарларга киргизүү демилгеси, мыйзамдуулук менен саясий көзөмөлдүн ортосундагы жипти улам жукаратууда. Нью-Йорктун жаңы мэри, жаш жана прогрессивдүү көз караштагы Зохран Мамдани, социалдык саясатты, жарандык теңдикти жактаган инсан. Бирок дал ошол позициясы үчүн президент тарабынан “коммунист” деп аталганы, идеологиялык кагылыштын символуна айланды.

Эгер “коопсуздукту сактоо” шылтоосу менен федералдык күчтөрдүн кириши ишке ашса, анда жергиликтүү өз алдынчалык түшүнүгү жоюлат. АКШдагы демократиянын негизги тиреги болуп келген, федералдык бийлик менен шаар бийлигинин ортосундагы саясий тең салмактуулукка доо кетет.

Бүгүн Нью-Йоркто болуп жаткан окуя жөн гана саясий жаңжал эмес. Бул абал мамлекет менен жарандын ортосундагы ишенимдин, укуктук эркиндиктин сыноосу. Эгер шаар өзүнүн тургундарын коргой албай калса, анда федералдык бийлик “коопсуздук” деген түшүнүктү өзүнө ыңгайлуу кылып кайра аныкташы мүмкүн.