Нарын облусунда Кыргыз Республикасынын Президентинин Ыйгарым укуктуу өкүлүнүн Аппаратынын жыйынтыктоочу коллегиясы болуп өттү. Анын ишине Кыргыз Республикасынын Министрлер Кабинетинин Төрагасынын орун басары Эдил Байсалов катышты.

Жыйындын жүрүшүндө аймактын социалдык-экономикалык өнүгүүсүнүн жыйынтыктары чыгарылды. 2025-жылдын жыйынтыгы боюнча облуста өнөр жай өндүрүшүнүн көлөмү 2,5 эсеге көбөйгөнү белгиленди. Көрсөткүчтөрдүн өсүшүнө Солтон-Сары алтын кенинде жаңы ишкананын ишке кириши олуттуу салым кошту.

Нарын облусу өнүгүүнүн жаңы этабына киргени баса белгиленди. Аймакта бир эле учурда улуттук масштабдагы ири инфраструктуралык долбоорлор ишке ашырылууда. Атап айтканда, трансконтиненталдык темир жолдун курулушу башталды, Балыкчы – Кочкор темир жол линиясын кийин узартуу менен куруу улантылууда. Ошол эле учурда Торугарт – Казарман маршруту боюнча жаңы автомобиль жолунун курулушу башталууда, бул транзиттик ташуулардын аралыгын жана убактысын кыйла кыскартууга, аймактын логистикалык натыйжалуулугун жогорулатууга мүмкүндүк берет.

Жүздөгөн километр автожолдорду асфальттоо жана заманбап транспорттук инфраструктураны түзүү каралган. Коллегияда сөз сүйлөгөн Эдил Байсалов Нарын облусунун өлкөнүн келечеги үчүн стратегиялык маанисин баса белгиледи.

«Президент Садыр Жапаровдун чечими менен салынып жаткан жаңы темир жана автомобиль жолдору Теңир-Тоо тоолорундагы көмүр, темир рудасы, боксит, сейрек кездешүүчү элементтер жана башка кен байлыктардын эбегейсиз запастарын өздөштүрүү үчүн принципиалдуу жаңы шарттарды түзүүдө. Облус жетекчилигинин жана бардык мамлекеттик органдардын алдына бул ресурстарды системалуу өздөштүрүүнү камсыз кылуу жана бул жерде өлкөнүн ири өнөр жай ишканаларын түзүү милдети коюлду. Жакынкы жылдарда Нарын облусу Кыргызстандын негизги өнөр жай борборлорунун бири жана өлкөнүн эң динамикалуу өнүгүп жаткан аймактарынын бирине айланат», – деп белгиледи ал.

Коллегиянын жыйынтыгында облустун социалдык-экономикалык өнүгүүсүнүн негизги милдеттери жана артыкчылыктары аныкталып, мамлекеттик жана жергиликтүү бийлик органдарынын жетекчилерине конкреттүү тапшырмалар берилди.