«Аю» холдинг компаниясынын негиздөөчүсү Шаршенбек Абдыкеримов социалдык тармактагы баракчасына билдирүү жазып, УКМКнын Бишкек шаардык мурдагы жетекчиси Элдар Жакыпбековду айыптады.

Шаршенбек Абдыкеримов Элдар Жакыпбеков УКМКнын мурдагы жетекчиси Камчыбек Ташиевдин көрсөтмөсү менен ага жана бизнесине каршы иш-аракеттерди жасаганын айтты.

“Ал Камчыбек Ташиевдин жетекчилиги алдында Улуттук коопсуздук боюнча мамлекеттик комитеттин кызматкерлери менен биргеликте менин компанияма, бизнесиме жана мага каршы түздөн-түз террордук чабуул жасаган адам. Бирок азыр мен алар жөнүндө ойлонбойм. Мен азыр өз жашоом жөнүндө гана ойлонуп жатам”.

Ишкердин айтымында, Кыргызстандагы ыңкылаптан кийин анын жашоосу толугу менен өзгөргөн; кыска убакыттын ичинде ал бизнесинен, ден соолугунан, үй-бүлөсүнөн ажырап, Лондондо жалгыз калганын жазды.

“Мен көп учурда өзүмө ушул суроолорду бере берем: Булар кантип болду? Отуз жыл бою чоң бизнес куруу. Миңдеген адамдарды жумуш менен камсыз кылган бизнеске өтүү. Анан үч эле жылдын ичинде бүт баарын жоготуп, жалгыз калуу. Бизнесиңди жоготуу. Ден соолугуңду жоготуу. Үй-бүлөңдү жоготуу жана Лондондо жалгыз калуу. Досторуң жок. Аялың жок. Туугандарың жок. Балдарың жок. Баары жок. Жалгыз!”.

Бизнесмен өзүнүн жакын чөйрөсүн да чыккынчылыкка айыптады. Операциялардан кийин жашоо үчүн күрөшүп жатканда, айрымдар анын мүлкүн жана баалуу буюмдарын бөлүп, менчиктеп башташканын билдирди.

“Бул үч жыл ичи мага адамдардын чыныгы жүзүн жана «баалуулуктарын» көрсөттү. Мен чыккынчылыкты көрдүм. Алдамчылыкты көрдүм. Ач көздүктү көрдүм. Көп жылдар бою жанымда жүргөн адамдар дароо менин оорумдан пайдаланышты. Операциялардан кийин өзүм өмүр менен өлүмдүн ортосунда жатканымда, көптөр мени «аман калбайт» деп ойлошту. Өлө турганымды гана ойлошту. Мен өз өмүрүм үчүн күрөшүп жатканда, алар ондогон жылдар бою мен өзүм курган оокат-баалуулуктарымды бөлүп, талап-тоной башташты. Досторум. Туугандарым. Ишенген адамдарым”.

Эл арасында “Шаки” деген каймана аты менен таанымал ири ишкер “Аю” холдингинин кожоюну, Шаршенбек Абдыкеримов учурда Кыргызстанда эмес.

Ага каршы бир катар кылмыш иштери ачылган жана эл аралык издөө жарыяланган. Аны камакка алуу боюнча сыртынан сот чечими да чыккан.