АКШ Газада ок атышпоо режимин сактоого жардам берүү үчүн Жакынкы Чыгышка 200 аскерин жиберет. Бул тууралуу NBC News билдирди.

Маалыматка ылайык, АКШ Израил менен Хамастын ортосунда ок атышууну токтотуу жана барымтадагыларды бошотуу боюнча жетишилген келишимдин аткарылышын көзөмөлдөө үчүн атайын координациялык борбор ачат.

«Координациялык борбордо транспорт, пландоо, коопсуздук, логистика жана инженерия тармагында тажрыйбасы бар 200гө жакын аскер кызматкерлери иштейт», — деп айтылат маалыматта.

Маалыматка ылайык, америкалык аскерлер Газа тилкесине түз кирбейт. Борбордун кызматкерлери ок атышпоо келишиминин аткарылышын көзөмөлдөп, Газада жарандык башкарууга өтүүгө көмөктөшөт.

Басылманын маалыматына караганда, бул жоокерлер АКШнын Борбордук командачылыгынан жана башка бөлүктөрдөн жөнөтүлөт. Алар облуска келе башташты жана борборду түзүүнүн үстүндө иштеп жатышат.

Миссиянын курамына АКШнын өнөктөш өлкөлөрдүн аскер кызматкерлери жана жеке уюмдардын өкүлдөрү кирээри баса белгиленди. Анын курамына Египеттин, Катардын, Түркиянын жана БАЭнин (Бириккен Араб Эмираттары) аскер кызматкерлери да кириши мүмкүн.

Белгилей кетсек, АКШ президенти Дональд Трамп Израил менен ХАМАСтын ортосундагы тынчтык планынын биринчи фазасы боюнча келишимге кол коюлганын жарыялаган. Бул этап барымтадагыларды бошотууну жана Израилдин аскерлерин макулдашылган линияга чыгарууну камтыйт.

Эске сала кетсек, буга чейин Евробиримдиктин тышкы иштер жана коопсуздук саясаты боюнча жогорку өкүлү Кайя Каллас Евробиримдик АКШ президенти Дональд Трамптын Газа тилкесинде ок атышпоо планын ишке ашыруу үчүн бардык чараларды көрөөрүн билдирген. Калластын айтымында, Газадагы ок атышпоо планынын биринчи фазасы боюнча келишим «маанилүү жетишкендикти» билдирет.

Мухамад Ходиев, Ташкен