Ысык-Көлдүн суусунун сапатына комплекстүү мониторинг жүргүзүлдү
Кыргыз Республикасынын Өзгөчө кырдаалдар министрлигине караштуу Гидрометеорология кызматы (Кыргызгидромет) Ысык-Көл көлүнүн суусунун сапатына комплекстүү гидрохимиялык мониторинг жүргүздү.

Маалыматка ылайык, изилдөө 2026-жылдын 8–13-июнь күндөрү, туристтик сезондун активдүү этабы башталганга чейин уюштурулган.

Мониторингдин негизги максаты — көлдүн суусунун сапаты боюнча актуалдуу маалыматтарды алуу жана анын өзгөрүү динамикасына баа берүү болду.

Экспедициянын алкагында суу үлгүлөрү Суучулдар кызматы менен биргеликте алынды. Көлдүн борбордук бөлүгүндө иштер «Мөлтүр» илимий-изилдөө кемеси аркылуу жүргүзүлсө, жээкке жакын аймактарда моторлуу кайыктар пайдаланылган.

Мониторинг Ысык-Көлдүн бүткүл акваториясын камтып, 17 көзөмөл пунктунда жүргүзүлгөн. Изилдөөлөр суунун үстүңкү катмарынан (0,5 метр) баштап түпкү горизонтторго чейин вертикалдык профиль боюнча жүргүзүлүп, гидрохимиялык абалга комплекстүү баа берүүгө мүмкүнчүлүк түзгөн.

Экспедициянын жүрүшүндө жалпысынан 35 суу үлгүсү алынган. Туруксуз компоненттер боюнча анализдердин бир бөлүгү талаа шартында — кеме борту менен көчмө гидрохимиялык лабораторияда жүргүзүлгөн.

Калган үлгүлөр Бишкектеги Кыргызгидрометтин лабораториясына жеткирилип, учурда суунун сапаты боюнча изилдөөлөр уланууда.

Бул иштер Кыргыз Республикасынын Өзгөчө кырдаалдар министрлигинин 2026-жылдын 26-майындагы №460 буйругу менен бекитилген «2030-жылга чейинки мезгилге Ысык-Көл экологиялык-экономикалык системасынын туруктуу өнүгүү концепциясын ишке ашыруу боюнча иш-чаралар планынын» алкагында жүргүзүлүүдө.