АКШ президентинин катышуусунда өткөн Ак үйдүн алдындагы кабарчылар ассоциациясынын сый-тамагы учурунда ок атышуу болду. Мамлекеттин биринчи адамдары эвакуацияланып, иш-чара бир айга жылдырылды. Кылмышка шектүү кармалды, анын максаттары азырынча белгисиз.

Ок атышуунун үндөрүнө окшош добуштар иш-чара кызып жаткан маалда чыкканын ошол учурда Washington Hilton мейманканасынын кабыл алуу залында жүргөн Би-Би-Синин кабарчылары билдиришти.

Андан кийин Жашыруун кызматтын кызматкерлери куралдарын кармап, залга чуркап киришкен. Би-Би-Си кабарчысынын айтымында, агенттер: ”Ок атылды!“ - деп кыйкырышкан.

Жогорку кызматтагы чиновниктер тез арада эвакуацияланды. Алардын ичинде Дональд Трамп өзү, АКШнын биринчи айымы Мелания Трамп, вице-президент Жей Ди Вэнс, коргоо министри Пит Хегсет жана саламаттыкты сактоо министри Роберт Кеннеди болгон.

Кечки тамактын катышуучулары алгачкы ок үндөрү чыкканда столдордун астына жашынышкан.

Бир аз убакыттан кийин АКШ президенти Дональд Трамп окуядан кийинки алгачкы билдирүүсүн өзүнүн Truth Social социалдык тармагына жазды.

”Вашингтондогу кече укмуштуудай болду. Жашыруун кызмат жана укук коргоо органдары фантастикалык жумуш жасашты. Алар тез жана тайманбай аракет кылышты“, -деп жазган Трамп.

Ал ошондой эле ок чыгарган адам кармалганын кошумчалады.

CNN телеканалы билдиргендей, бийлик шектүүнүн өздүгүн аныктады: ал Калифорниядан келген 30 жаштагы эркек киши.