Кытай Коммунисттик партиясынын Борбордук комитетинин башкы катчысы, Кытай Эл Республикасынын төрагасы жана Борбордук аскер кеңешинин төрагасы Си Цзиньпин жашы жете электердин адеп-ахлактык жана идеологиялык тарбиясы стратегиялык жана фундаменталдуу мааниге ээ экенин белгилеп, алардын саламат жана ар тараптуу өсүшү үчүн жагымдуу социалдык чөйрөнү калыптандырууда коомдун бардык күчтөрүн бириктирүүгө чакырды. Бул тууралуу NazarNews агенттигине кытайлык CCTV-Plus маалымат агенттиги билдирди.

Кытай лидери берген көрсөтмөлөрдү ишке ашыруу максатында 15-декабрда Бээжин шаарында жашы жете электердин адеп-ахлактык жана идеологиялык тарбиясына арналган симпозиум өттү. Иш-чарага ККП БКнын Саясий бюросунун Туруктуу комитетинин мүчөсү Цай Ци катышып, баяндама жасады.

Анын айтымында, 2012-жылы өткөн ККПнын XVIII съездинен бери партиянын Борбордук комитети, анын өзөгү болуп саналган жолдош Си Цзиньпиндин жетекчилиги алдында, өспүрүмдөрдүн адеп-ахлактык тарбиясына өзгөчө маани берип келет. Си Цзиньпин тарабынан айтылган маанилүү пикирлер жана концептуалдык идеялар бул багыттагы иштин туура жолун, жоопкерчилигин жана миссиясын, ошондой эле аны жаңы доордо өркүндөтүүнүн ыкмалары менен багыттарын так аныктап берди.

Цай Ци мектептердин, үй-бүлөлөрдүн жана коомчулуктун биргелешкен тарбия механизмин өркүндөтүү зарыл экенин белгилеп, жашы жете электерди социализмдин негизги баалуулуктарына ылайык практикалык багытта тарбиялоого көңүл буруу керектигин айтты. Ошондой эле үй-бүлөлүк тарбиянын негизги ролун ар тараптуу пайдаланууга өзгөчө маани берүү зарылдыгын кошумчалады.

Мындан тышкары, коомдук-маданий жагымдуу чөйрөнү активдүү калыптандыруу, жашы жете электер үчүн сапаттуу маданий продуктыларды өндүрүү жана жогорку деңгээлдеги маданий кызматтарды көрсөтүү маанилүү милдеттердин бири экени белгиленди.

Симпозиум ККП БКнын Саясий бюросунун мүчөсү, Борбордук комитеттин Пропаганда бөлүмүнүн башчысы Ли Шулэйдин төрагалыгы алдында өттү.