Эл арасында “Бален” деген каймана ат менен белгилүү рэпер Балендра Шах Непалдын премьер-министри болуп шайланды.

Алгач, Катмандунун мэри болуп шайланган рэпер Балендра Шахтын партиясы 5-мартта өткөн парламенттик шайлоодо жеңишке жетишкенден кийин, “зумерлер революциясынан” алты ай өтпөй премьер-министрлик кызматка киришти.

Балендра Шахтын Улуттук көз карандысыз партиясы мөөнөтүнөн мурда өткөн парламенттик шайлоодо абсолюттук көпчүлүккө ээ болуп, 275 орундан 182 мандатты жеңип алды.
35 жаштагы Шах Өкүлдөр палатасына шайланып, мурдагы премьер-министр 74 жаштагы К.П. Шарма Олини жеңди. Оли өткөн жылдын сентябрь айында массалык нааразылык акцияларынан кийин кызматтан алынган.

Кесиби боюнча инженер-куруучу болгон Балендра Шах Непалдын андеграунд хип-хоп сахнасында коррупцияга жана социалдык теңсиздикке каршы ырдап белгилүү болгон.
2022-жылы анын популярдуулугу күтүүсүздөн өсүп, ал Катмандунун мэри болуп шайланган.
Шайлоо өнөктүгү учурунда ал өзүн «Z муунунун» өкүлү катары көрсөтүп, элитанын коррупциясын жоюуга жана көптөгөн непалдыктарды чет өлкөгө иш издеп кетүүгө мажбур кылган жумушсуздукту азайтууга убада берген.

Бейшемби кечинде Балендра Шах өзүнүн жеңишин белгилеп, 1 миллиондон ашык катталуучусу бар YouTube каналында өлкөнүн биримдигине чакырган ырын жарыялады.
«Jay Mahakaali» аттуу композиция бир саатка жетпеген убакытта 300 миңден ашык көрүүгө ээ болду.