Россиянын президенти Владимир Путин 25-ноябрдан 27-ноябрга чейин Кыргызстанга мамлекеттик сапар менен келет. Муну Россиянын президентинин жардамчысы Юрий Ушаков билдиргенин, ТАСС кабарлайт.

Россиянын президентинин Кыргызстанга мамлекеттик сапары бүгүн башталат. Сапар эки күнгө созулат. Ошондой эле 27-ноябрда Бишкекте Жамааттык коопсуздук келишими уюмунун Жамааттык коопсуздук кеңешинин сессиясы өтөт.

Ушаковдун айтымында, сапардын программасы 25-ноябрдын кечинде башталат.

"Бишкекке келгенден кийин, Кыргызстандын президенти Садыр Жапаров Владимир Путинди аэропорттон тосуп алат. Алар Жеңиш аянтындагы Өчпөс отко гүлчамбар коюшат", - деди ал.

Андан кийин президенттер "Ала-Арча" резиденциясында бейрасмий жолугушуу өткөрүшөт.

26-ноябрда "Ынтымак Ордодо" расмий тосуп алуу аземи болот. Андан кийин кыргыз-орус сүйлөшүүлөрү өткөрүлүп, анын жүрүшүндө саясий, соода-экономикалык, гуманитардык жана башка тармактардагы эки тараптуу кызматташтыктын негизги маселелери талкууланат. Лидерлер эки тарап үчүн эң актуалдуу маселелер боюнча пикир алмашат.

Ушаковдун пикиринде, кеңейтилген сүйлөшүүлөрдө соода-экономикалык, энергетика, билим берүү, саламаттык сактоо жана миграция жаатындагы кызматташтык маселелери каралат.

Орус делегациясынын курамында вице-премьер-министр Алексей Оверчук (орус тараптан өкмөттөр аралык комиссияны жетектейт), ички иштер министри Владимир Колокольцев, спорт министри Михаил Дегтярев, саламаттык сактоо министри Михаил Мурашко, транспорт министри Андрей Никитин, экономикалык өнүгүү министри Максим Решетников, илим министри Валерий Фальков жана энергетика министри Сергей Цивилев бар. Делегациянын курамына президенттик администрациянын жетекчисинин орун басарлары Дмитрий Песков жана Максим Орешкин да бар.

Ошондой эле россиялык делегациянын курамында Роспотребнадзордун башчысы Анна Попова, Борбордук банктын төрайымы Элвира Набиуллина, "Росатомдун" башкы директору Алексей Лихачев, бизнес өкүлдөрү Роман Абрамович, Муса Бажаев, Петр Фрадков жана башкалар болот.

Сүйлөшүүлөрдүн жыйынтыгында Кыргызстан менен Россиянын президенттери союздаштыгын жана стратегиялык өнөктөштүгүн тереңдетүү боюнча биргелешкен билдирүүгө кол коюшат. Бул документте эки тараптуу байланыштарды узак мөөнөттүү келечекте андан ары чыңдоо боюнча максаттар белгиленген.

Ошондой эле бир катар өкмөттөр аралык жана коммерциялык документтерге кол коюлат: жети документ билим берүү, экономика, саламаттык сактоо, миграция, калктын санитардык-эпидемиологиялык жыргалчылыгы жана башка тармактардагы кызматташууну камтыйт. Кол коюлган документтер менен алмашуудан кийин мамлекет башчылары билдирүү жасашат.