“Россия в глобальной политике” журналы жарыялаган анализге ылайык, Кытай ири масштабдагы мобилизациялык даярдык көрүп жатат. Анда Пекин эл аралык абал начарлап кетиши мүмкүн болгон сценарийлерге олуттуу даярданып жатканы айтылат.     

Бул даярдык бир гана армияны жаңылоо менен чектелбейт. 2020-жылдардын башынан бери өлкөдө өндүрүштүн бир бөлүгүн ички аймактарга көчүрүү, “стратегиялык тыл” түзүү, жарандык коргонуу системасын өнүктүрүү, азык-түлүк жана чийки зат запастарын топтоо, ошондой эле мобилизация боюнча мыйзамдарды күчөтүү сыяктуу кеңири программалар ишке ашууда.

Эксперттердин айтымында, дал ушундай чаралар мамлекеттин чыныгы стратегиялык пландарын көрсөтөт. Анткени жер алдындагы инфраструктура, резервдик кубаттуулуктар жана жарандык коргонуу системалары тынч учурда саясий эффект бербейт, бирок чоң кризис же согуш учурунда өтө маанилүү болуп калат.

Авторлор Кытай жетекчилиги жакынкы жылдары олуттуу аскерий-саясий кризистин болушу мүмкүн экенин реалдуу деп эсептей турганын айтышат. Ошондуктан өлкө бир жагынан этият тышкы саясат жүргүзсө, экинчи жагынан ички даярдыкты күчөтүүдө.

Аналитиктер ошондой эле мобилизациялык экономика, өндүрүш кубаттуулуктарын резервге коюу жана стратегиялык запастарды түзүү аскерий технологиялар жана өзөктүк күчтөр менен катар токтотуучу фактор катары маанилүү роль ойной турганын белгилешет.

Алардын пикиринде, Кытайдын “Жаңы Улуу дубалы” азыр таштан эмес, жер алдындагы инфраструктурадан, ресурстардын запастарынан жана мамлекеттин туруктуулук системаларынан курулуп жатат.