Германия Израилдин дүйнөдөгү эң татаал ракетадан коргонуу системаларынын бири болуп эсептелген «Arrow-3» комплекси жакын арада өлкө аймагына жайгаштырыларын кабарлады. Бул тууралуу «Defence Industry Europe» порталы жазды.

Бул чечим Россия менен Европадагы өлкөлөр ортосунда чыңалуу күчөп жаткан маалда, ошондой эле Европа коргонуу архитектурасынын кеңири масштабдагы жаңыртылышы жүрүп жаткан шартта кабыл алынды.

Бул континент үчүн тарыхта биринчи жолу Израилден тышкары жерде аталган комплекстин реалдуу жайгаштырылышы болуп саналат.

Европадагы абадан коргонуу системаларынын тарыхый жайгашуусу

Германиянын Коргоо министрлигинин билдирүүсүнө ылайык, комплекс жакынкы күндөрдө расмий түрдө тааныштырылып, жигердүү күжүрмөн нөөмөткө киргизилет.

Израиль менен АКШ биргелешип иштеп чыккан бул система атмосферанын чегинен тышкары баллистикалык ракеталарды тосуп калууга багытталган.

2023-жылы Берлин менен Иерусалимдин ортосунда баасы болжол менен 4 млрд евро болгон келишим түзүлгөн — бул Израиль менен Евробиримдик өлкөсү ортосундагы аскердик-техникалык кызматташуу тарыхындагы эң ири келишим.

«Arrow-3» системасын жайгаштыруу Европанын көп баскычтуу «Асман калканы» (European Sky Shield Initiative) программасынын негизги элементи катары каралууда. Бул демилгеге азыр 20дан ашык өлкө кошулган.

Германия бул комплексти «Европанын коопсуздугу үчүн бурулуш учур» деп атап, система азыркы татаалдашып жаткан геосаясий шартта «жаңы стратегиялык тоскоолдук линиясынын» бөлүгү болорун белгиледи.

Ирандын чабуулунан кийинки талаштар жана системанын натыйжалуулугу тууралуу суроолор

Европалык өнөктөштөрдүн жогору баасына карабастан, эксперттер арасында системанын реалдуу натыйжалуулугу боюнча талкуулар уланып жатат.

2024-жылдын жазында Иран массалык ракеталык сокку ургандан кийин Израилдин көп баскычтуу коргонуу системасынын мүмкүнчүлүктөрү боюнча ички талаштар күчөгөн.

Ал кезде Иерусалим жана анын союздаштары ракеталардын көбүн тосуп калган, бирок бул окуя сионисттик абадан коргонуу системасынын биринчи ири масштабда сыноодон өтүшү болуп саналган.

Кээ бир аналитиктердин айтымында, эгер «Arrow-3» бардык коркунучтардан толук коргоду деп эсептелсе, Израиль мындай маанилүү системаны чет өлкөгө чыгармак эмес.

Дал ошол чабуулдан кийин айрым израилдик аскердик эксперттер өлкө өз коргонуу мүмкүнчүлүктөрүн ашыкча идеалдаштыруудан алыс болушу керектигин, абсолюттук коргонуу деген түшүнүк жок экенин белгилешкен.

Ошого карабастан, Германия «Arrow-3» системасын узак аралыктагы ракеталарды тосууга ылайыктуу оптималдуу чечим деп эсептеп, анын жайгаштырылышы Европанын коргонуу жөндөмүн жогорулатууга жана Иерусалим менен Вашингтондун ортосундагы саясий-аскердик кызматташтыкты бекемдөөгө багытталган стратегиялык кадам экенин баса белгиледи.

Булак: Еurasiatoday