Чүй облусунда батир уурулукка шектүү жаран кармалды

Журналист: МЭЭРИМ ЭСЕНГУЛ

29.04.2026, 17:54

3555

кылмыш жана кырсык

2026-жылдын 16-апрелинде Ысык-Ата райондук ички иштер бөлүмүнө 1982-жылы туулган А.Н. аттуу жаран арыз менен кайрылган. Арызда көрсөтүлгөндөй, 2026-жылдын 16-апрелинде саат 11:00дөн 17:10го чейинки убакыт аралыгында белгисиз жаран Чүй облусу, Ысык-Ата району, Ново-Покровка айылында жайгашкан турак үйгө жашыруун кирип, акча каражаттарын жана мүлктөрдү уурдап кеткен. Тактап айтканда: 430 000 (төрт жүз отуз миң) сом, 1 500 (бир миң беш жүз) АКШ доллары, балдардын акча чогултуучу кутучасындагы болжол менен 12 000 (он эки миң) сом, капчыктагы 9 000 (тогуз миң) сом, 700 (жети жүз) евро, ошондой эле эки даана кол саат, алардын бири — баасы 17 000 (он жети миң) сом болгон саат уурдалган. Кылмыш жасалгандан кийин кылмышкер белгисиз багытта качып кеткен.

Бул факт каттоого алынып, Кыргыз Республикасынын Кылмыш-жаза кодексинин 205-беренесинин (уурулук) негизинде кылмыш иши козголгон.

Ыкчам-тергөө жана ыкчам-издөө иш-чараларынын жүрүшүндө кылмышка шектүү катары 1995-жылы туулган А.у.М. аттуу жаран аныкталган. Ал Кыргыз Республикасынын Жазык-процессуалдык кодексинин 96-беренесине ылайык кармалып, Ысык-Ата РИИБдин убактылуу кармоочу жайына киргизилген.

Мындан тышкары, анын Чүй облусунун башка аймактарында ушул сыяктуу кылмыштарды жасоого катыштыгы бар же жоктугу текшерилүүдө.

Тергөө иштери улантылууда.