Россиялык альпинист Наталья Наговицына каза болду деп жарыяланды. Бул тууралуу Альпинизм жана аскага чыгуу федерациясынын президенти Эдуард Кубатов социалдык тармактагы баракчасында билдирди.

Маалыматка ылайык, бүгүн, 2-сентябрда Түштүк Эңилчек базалык лагеринен Жеңиш чокусунун боорлорун бийик учкан дрондун жардамы менен деталдуу (эки жолу) визуалдык текшерүү жүргүзүлгөн.

«Тилекке каршы, биз Наталья Наговицынанын тирүү калуу белгилери жок экенин билдирүүгө аргасызбыз! Бардык куткаруу иштери токтотулду жана биз баарыбыз үчүн бул кайгылуу фактыны моюнга алышыбыз керек! Текшерүүнүн бардык видеоматериалдары (10 мүнөттөн ашык) Натальянын уулуна жеке өзүнө берилет. Кыргыз тарап альпинистти куткарууну уюштуруу үчүн колдон келгендин баарын жасады, бирок өтө бийиктик, катаал аба ырайы, тик учактын катуу конушу жана куткаруучулардын физикалык абалы күтүлгөн натыйжаларга жетүүгө мүмкүндүк берген жок! Жеңиштин тарыхында 7200 метр бийиктикте бир дагы ийгиликтүү куткаруу операциясы болгон эмес жана биз куткаруучу-альпинисттердин өмүрүн андан ары тобокелге салууга акыбыз жок болчу!» — деп жазды ал.

Кубатов куткаруу иш-чараларын уюштурууга катышкандардын баарына ыраазычылык билдирди.

Эскерте кетсек, Орусиянын жараны Наталья Наговицына 12-августта Жеңиш чокусунан түшүп келе жатканда бутунан жаракат алган. Жакынкы жерде жүргөн башка альпинисттер ага 7100 метр бийиктиктеги асканын түбүнө жайгашууга жардам берип, уктоочу баштык, чатыр, суу жана бир аз тамак-аш калтырып, эвакуациялоону уюштуруу үчүн ылдый түшүшкөн. Бирок түшүп бара жатканда алардын бири — италиялык жаран ден соолугуна байланыштуу көйгөйлөрдөн улам каза болуп, анын сөөгү Важа 6900 метр бийиктеги Пшавела чокусунда калган.

16-августта Коргоо министрлигинин тик учагы куткаруучулар жана альпинисттер менен Жеңиш чокусунун аймагына жөнөтүлгөн, бирок ал 4600 бийиктиктеги Жылдызча мөңгүсүнүн жогору жагынан кырсыктап, бир нече адам жабыркаган.

19-августта 7100 м бийиктикке учурулган дрон россиялык жаран жаткан чатырды видеого тарткан. «Түштүк Эңилчек» базалык лагериндеги куткаруучулар анын тирүү экенин билдиришкен, ошондуктан экинчи куткаруу операциясы уюштурулган. 23-августта куткаруу отрядынын жетекчисинин жаракатынан, ошондой эле аба ырайынын начардыгынан улам альпинисттер базага кайтып келишкен.