Ал ошондой эле маегинде Орусия согушту токтотпосо, Кремлдин расмийлери эң жакын бомба баш калкалоочу жай кайда экенин билиши керектигин баса белгиледи. Анын айтымында, Трамп Украина Орусиянын соккусуна ылайыктуу жооп берерине макул болгон. Бул тууралуу kun.uz жазып чыкты. 

Украинанын президенти Владимир Зеленский америкалык Axios басылмасына берген маегинде Орусия менен согуш токтотулса, экинчи мөөнөткө президенттикке талапкерлигин койбоого даяр экенин билдирди.

"Эгер биз орустар менен согушту токтотсок, мен [шайлоого] катышпоого даярмын, анткени шайлоо мен үчүн максат эмес. Мен бул өтө оор учурда өлкөм менен бирге болууну, ага жардам берүүнү абдан каалайт элем. Менин максатым согушту токтотуу", - деди украин президенти маегинде.

Эске сала кетсек, Зеленский 2019-жылдын май айынан бери президент болуп келет. Анын биринчи президенттик мөөнөтү 2024-жылдын май айында бүтүшү керек болчу, бирок Украинанын мыйзамдары аскердик абал учурунда жаңы шайлоо өткөрүүгө тыюу салгандыктан, Зеленскийдин биринчи мөөнөтү автоматтык түрдө узартылган. Бул орус бийликтерин Украинанын президентин “мыйзамсыз” деп жарыялоого түрттү.

Ошол эле учурда Украинанын ичинде, атүгүл Зеленскийдин саясий оппоненттеринин арасында ал согуштук абал жоюлмайынча президент бойдон калышы керек деген консенсус бар.

Зеленский өзү да согуш аяктап, аскердик абал жоюлгандан кийин президенттик шайлоо өткөрүүнүн маанилүүлүгүн бир нече жолу айткан. Axios менен болгон маегинде ал согуш толугу менен бүтпөсө дагы, эгер Орусия менен узак мөөнөттүү элдешүү түзүлсө, эрте шайлоо өткөрүүнү көздөй турганын айтты.

Соңку сурамжылоолор көрсөткөндөй, эгер шайлоо азыр өтсө, шайлоочулардын эң көп колдоосуна Владимир Зеленский ээ болмок. Рейтинг социологиялык борборунун август айындагы сурамжылоосуна ылайык, украиналыктардын 35,2 пайызы ага добуш берүүгө, 25,3 пайызы анын негизги потенциалдуу атаандашы, Украинанын Куралдуу күчтөрүнүн мурдагы башкы командачысы Валерий Залужныйга добуш берүүгө даяр. Ошол эле учурда жалпы ишеним боюнча Зеленский Залужныйдан артта калууда.

Баса, Зеленский дагы эмне деди?

Зеленский маегинде эгер Орусия согушту токтотпосо, Кремлдин расмийлери эң жакын бомба баш калкалоочу жай кайда экенин билиши керектигин айтты.

Украин президентинин айтымында, Дональд Трамп менен жакында болгон жолугушуусунда ал Киев Орусиянын соккусуна "бирге бир" принциби боюнча жооп кайтаруу зарылдыгы тууралуу маселени көтөргөн. Зеленский Америка президенти Орусиянын энергетикалык инфраструктура объектилерине жана аскерий заводдоруна сокку урууларды колдой турганын баса белгиледи.

Анын айтымында, ал Трамптан Владимир Путинди сүйлөшүү үстөлүнө отурууга мажбурлай турган жаңы алыс аралыкка атуучу куралдарды берүүнү суранган. Зеленский Киев Вашингтондон кандай курал сурап жатканын тактаган жок, бирок эгер ал аларды алса, аны колдоно турганын кошумчалады.

"Алар бомба баш калкалоочу жайлар кайда экенин билиши керек. Эгер алар согушту токтотпосо, баары бир аларга керек болот. Алар ар дайым биздин жообубузга ишене алышы керек" деди Зеленский Кремлдин расмий өкүлдөрүнө карата.

Орусиянын Коопсуздук кеңешинин төрагасынын орун басары Дмитрий Медведев Зеленскийдин сөздөрүнө буга чейин социалдык тармактарда жооп кайтарган. "Ал дагы бир нерсени билиши керек: Орусия бомба баш калкалоочу жай жардам бербеген куралдарды колдоно алат. Америкалыктар муну унутпашы керек", - деп жазган ал.