АКШ тарыхта биринчи жолу Россиянын эң ири мунай компанияларына карата эң катуу санкцияларды киргизди. Бул чектөөлөрдүн алдында мамлекеттик «Роснефть», жеке менчик «Лукойл» жана алардын туунду компаниялары турат. Мурда бул компанияларга салыштырмалуу жеңил, сектордук санкциялар гана колдонулуп келген. Бул жолу болсо АКШ аларды өзүнүн эң катуу тизмесине — SDN-листке (Specially Designated Nationals) киргизди.

Бул эмнени билдирет:

АКШ эми бул санкциялар аркылуу дүйнөдөгү бардык сатып алуучуларды эскертип жатат — кимде ким «Роснефть» же «Лукойлдан» мунай сатып алса, ошол мамлекет же компания да жазаланат.

Жылдын башында бул «кара тизмеге» башка эки орус компаниясы — «Газпромнефть» жана «Сургутнефтегаз» — да киргизилген эле. Бирок анда рынок реакция кылган эмес: алардын финансылык көрсөткүчтөрү өзгөрүүсүз калган.

Бул ирет абал таптакыр башка. Анткени «Роснефть» күнүнө 800 миң баррель, ал эми «Лукойл» 300 миң баррель мунай экспорттойт. Эгер АКШнын коркутуусунан улам сатып алуучулар бул компаниялардан баш тартса, дүйнөлүк рыноктон 1,1 миллион баррель мунай азаят. Бул чоң көлөм, натыйжада мунай тартыштыгы жана баанын көтөрүлүшү күтүлөт.

Россиянын мунайын эң көп сатып алуучу өлкөлөр — Индия жана Кытай. Эгер бул эки державанын экөө тең АКШнын санкцияларынан чочулап, мунай сатып алуудан баш тартса, Россия үчүн башка чоң базар калбайт. Анткени Индия менен Кытайдан кийин анчалык көлөмдө импорт кыла ала турган өлкө дүйнөдө жок.

Түркия да салыштырмалуу чакан сатып алуучу гана. Ошондуктан Россияга мунай өндүрүшүн күнүнө 1,1 миллион баррелге кыскартууга туура келиши мүмкүн.