Таиланддын премьер-министринин милдетин аткаруучу Пхумтам Вечаячай менен Камбоджанын премьер-министри Хун Манета Куала-Лумпурдагы (Малайзия) сүйлөшүүлөрдө ок атышууну токтотууну макулдашты, келишим жергиликтүү убакыт боюнча түн жарымында күчүнө кирет. Бул тууралуу 28-июлда Малайзиянын премьер-министри Анвар Ибрагим билдирди.

«Эки өлкө тең түн ортосунда токтоосуз жана эч кандай шартсыз ок атышууну токтотууга макул болду», - деп  Associated Press басылмасы  Анвар Ибрагимдин сөзүн келтирди.

АСЕАНдын (Түштүк-Чыгыш Азия мамлекеттеринин ассоциациясы) аймактык блогунун башчысы катары сүйлөшүүлөргө төрагалык кылган Анвар Ибрагим эки тарап тең нормалдуу жашоого кайтуу чаралары боюнча бирдиктүү түшүнүккө жетишкенин билдирди.

Таиланддын жана Камбоджанын премьер-министрлери Хун Манеттин ортосунда ок атышууну токтотуу жөнүндөгү сүйлөшүүлөр бүгүн, 28-июлда болуп өттү. Ага Америка Кошмо Штаттарынын жана Кытайдын расмий өкүлдөрү да катышты.

Белгилей кетсек, Таиланд менен Камбоджанын мамилелери 28-майда курчуп кеткен. Камбоджанын Преах Вихеар провинциясы менен Таиланддын Убон-Ратчахани провинциясынын ортосундагы талаштуу Пхонг аймагындагы Течо-Морокот кыштагында тай аскерлери Камбоджанын аскердик заставасын аткан.

Натыйжада, бир камбоджалык жоокер каза болуп, бир нечеси жаракат алган.

24-июлда Тамоантом, Тамоантух жана Такрабай храмдарынын айланасында кайрадан куралдуу кагылышуулар болгон.

Камбоджа аталган талаштуу аймактар боюнча маселени мыйзам чегинде чечүү максатында 2025-жылдын июнь айында Эл аралык сотко кайрылган. Таиланд болсо бул кадамга макул эместигин билдирген.

Мындан тышкары, 23-июлда чек арада мина жарылып, бир нече таиланддык жоокер жаракат алган. Эртеси, 24-июлда болгон атышуудан улам абал кескин начарлап, карапайым калк арасында курмандыктар болгон.