Салмагың кандай саясатчы? Дал ушундай рубриканын негизинде Кыргызстандын саясатында мамлекеттик жана коомдук иштерге активдүү аралашып жүргөн саясатчылардын, мамлекеттик ишмерлердин бейнеси тууралуу NazarNews.kg кыскача сүртүмдөрдөн берип турабыз. 

Бул жолку каарманыбыз – Президент Садыр Жапаровдун пресс-катчысы Аскат Алагөзов болмокчу. 
Учурда коом менен бийликтин ортосундагы ишеним көпүрөсүн “сындырбай” кармай турган жоопкерчиликтүү, татаал жана олуттуу маалыматтык саясаттын башында Президенттин пресс-катчысы Аскат Алагөзов турат десек жаңылышпайбыз.

Алагөзов акыркы мезгилдерде маалыматтык саясатты жаңы деңгээлге чыгарууга жан үрөп, ачык-айкындуулукка басым коюду. Ал коомдогу резонанстуу маселелерге ыкчам реакция жасап, маалыматтык боштук жаралбашы үчүн, Президенттин позициясын түшүнүктүү жана жеткиликтүү формада коомчулукка жеткирүү аракетин көрүүдө. 

Пресс-катчы катары маалымат каражаттары менен болгон мамилени системдүү жана тең салмактуу жүргүзүүгө көңүл бурууда. Анын эмоцияга алдырбаган сабырдуулугу – мамлекеттик кызматкер катары этикага болгон жоопкерчиликтүү мамилесин, кесипкөйлүүлүгүн көрсөткүчү десек жарашат.
Алагөзовдун иш алып баруусунда байкала турган дагы бир өзгөчөлүк – заманбап медиа чөйрөгө тез адаптация боло билүүсү. Анын маалыматты берүүдөгү форматтарды, ыкмаларды өзгөртүп, социалдык тармактарды активдүү колдонуу менен кеңири аудиторияга жетүүдө. Ал – учурдагы маалыматтык коопсуздуктун, коом менен бийликтин ортосундагы түшүнүшүүнүн маанилүү фигурасы.