Президент Садыр Жапаров Kaktus.media сайтынын журналисти Марат Уралиевдин суроолоруна жооп берди. 

Февралдагы саясий окуялар тууралуу 

–  Февралдагы саясий окуялар баарына белгилүү, аны чет өлкөлөрдө да байкап турушкан. Азыр “ишке ашпай калган төңкөрүш аракети” деп аталган кырдаалдын артында ким турган?

– Мен ар кандай булактардан маалымат алып турам. “75 адамдын кат” деп аталган окуя башталганда эле менде маалымат бар болчу. Бул кайрылуунун Жогорку Кеңешке келип түшүшүн, спикерге жана комитет жетекчилерине чейин жетишин көзөмөлдөп тургам.

Бул мезгилде документтин жүрүшү, тиешеси бар адамдардын аракеттери, ким ким менен жолугуп жатканы тууралуу маалымат алып турдум. Маселе парламенттин жыйынына чыгарылар алдында тез жана чечкиндүү чара көрдүм. Ситуация башынан эле көзөмөлдө болгон.

УКМК кызматкерлери жана депутаттар тууралуу

– Бул ишке УКМК кызматкерлери да катышканы айтылууда. Сиз силердин аракеттерден кабардар белеңиз? Айрым депутаттар мандатын тапшырышты, алар “75 катка” байланыштуубу?

– Президент жана башкы командачы катары мен күч органдарынын жетекчилеринин аракеттеринен кабардармын. Бирок баары 100% менин көзөмөлүмдө деп айта албайм, мен билбеген учурлар да болушу мүмкүн.

Депутаттар тууралуу айта турган болсом, парламентте саясий интригаларды жүргүзүүгө аракет кылган топ болгон. Алардын пландары ишке ашпай калгандан кийин айрымдары күнөөсүн түшүнүп, мандатын тапшырышкан болушу мүмкүн.

Акыркы жыйынтык тергөөнүн аягында чыгат. Депутаттар саясат оюндарынан алыс болуп, эл үчүн мыйзам чыгарууга көңүл бурушу керек.

 Камчыбек Ташиев тууралуу

–  Сиздин досуңуз Камчыбек Ташиев бул ишке катышканбы? Эгер катышса, эмнеге ал эркиндикте жүрөт?

–  Анын күнөөлүү же күнөөсүз экенин тергөө жана сот аныктайт. Азыр иш бүтө элек. Акыркы чечимди сот чыгарат.

Шаирбек Ташиев жөнүндө

–  УКМКнын мурдагы төрагасы Камчыбек Ташиевдин бир тууганы Шаирбек Ташиев камакта. Бул сиздин достугуңуздан улам ага жеңилдик болобу?

–  Жок, андай болбойт. Мен үчүн “дос”, “тууган” деген түшүнүк жок. Мамлекеттин жана элдин кызыкчылыгы биринчи орунда.

Тергөөнүн маалыматына ылайык, ал “Кыргызнефтегаз” ишканасындагы коррупциялык схемага катышкан, мамлекетке 4 млрд 115 млн сом зыян келтирилген. Зыян толук кайтарылгандан кийин гана бошотуу маселеси каралат.

Үй-бүлө жана балдары тууралуу

– Сиздин уулуңуз Джастин Сан менен жолукканда коштоп жүргөн. Балдарыңыз мамлекеттик иштерге аралашабы?

–  Жок. Мен үй-бүлө мүчөлөрүн мамлекеттик иштерге аралаштырбайм. Алар саясатка жана мамлекеттик кызматка катышпайт.

Мен кичүү уулума жетиштүү көңүл бурбай калганымды сезем, ошондуктан кээде ал мени коштоп жүрөт. Ал англис тилин жакшы билет жана котормочу катары жардам берет.

Бирок ал мамлекеттик иштерге же бизнеске аралашпайт.

Сабыр Жапаров тууралуу сындар

–  Сабыр Жапаров “Кумтөр” жана алтын менен байланыштуу деп айтылууда...

–  Бул 100% жалган маалымат. Ал Түркияда алтын иштетүү заводунда сүрөткө түшкөнү гана болгон. Эгер ал мыйзамсыз иш кылса, мындай сүрөттөргө түшмөк эмес.

Казино мыйзамы тууралуу

–  Казино мыйзамы коомдо талаш жараткан эле. Азыр натыйжасы кандай?

–  Бул мамлекеттин саясий чечими болгон. Бүгүн ал туура чечим экени далилденди. Кыргызстан жарандары казино ойнобойт. Негизинен туристтер жана чет элдиктер колдонушат. Бул бюджетке киреше алып келип, жумуш орундарын түздү.

Россияга иш сапары

–  Россияга сапарыңыз тууралуу ар кандай пикирлер айтылды...

–  Президентти эч ким чакырбайт. Бул сапар менин жеке демилгем болду. Владимир Путин менен эки күндүк сүйлөшүүдө кыргыз-орус мамилелеринин бардык маселелери каралды. Бир катар чечимдер кабыл алынды.

Россия –  биздин стратегиялык өнөктөшүбүз.