Коронавирустун дүйнөгө жайылышына байланыштуу, Сокулукта 400 киши чакырылган «той» токтотулду. Бул тууралуу бүгүн, 6-мартта  Бишкектеги маалымат жыйында саламаттыкты сактоо министринин орун басары Төлө Исаков билдирди.

Анын айтканына таянсак, Сокулук районунда кечээ, 5-мартта 400 киши чакырылган юбилей той өткөрүлмөк бирок, уюштуруучу иш-чараны токтотуп, чакырылган конокторду эскерткенин министрликке билдирген. «Ал башка жарандарды дагы чакырат. Бул анын өз ыяктыяры менен кабыл алынган чечим. Биз элдердин түшүнүүсүнө таянышыбыз керек», - деп билдирди Исаков.

Мындан тышкары, Кытай өлкөсү сыяктуу массалык иш-чараларды өткөрүү боюнча милдеттүү түрдө тыюу салынбай тургандыгын, жөн гана сунушталып жаткандыгын толуктады.

Эске сала кетсек, 5-мартта Бишкектин Биринчи май райондук соту Бишкектин борборунда митинг жана тынчтык чогулуштарын өткөрүүгө 1-июлга чейин тыюу салган. Мунун себебин коронавирустун жайылуусун алдын алуу менен түшүндүргөн.

Булак: NazarNews.kg