Гонконг университетинин ардактуу профессору баса белгилегендей, кийинки пандемиянын негизги булагы катары дем алуу жолдорун жабыркатуучу вирустар эң чоң тынчсыздануу жаратат. Гонконгдон ТАССтын кабарчысы жазды.

Кийинки пандемия сөзсүз болот, бирок дүйнө ага COVID-19 пандемиясына чейинкидей эле деңгээлде даяр болбой калышы мүмкүн. Мындай пикирин белгилүү вирусолог, Гонконг университетинин ардактуу профессору Малик Пейрис билдирген.

2003-жылы атипикалык пневмония вирусун ачкан окумуштуу кийинки пандемиянын негизги коркунучу катары дем алуу органдарына таасир этүүчү вирустарды атады.

«Биз келечектеги пандемиялар менен кандай күрөшө алаарыбызга кыйла көп көңүл бурушубуз зарыл. Анткени жаңы пандемиянын пайда болушу толук ыктымал», – деп Пейристин сөздөрүн South China Morning Post басылмасы кабарлады.

«COVID-19 бизге пандемиялар ден соолукка гана эмес, экономикага жана социалдык абалга да өтө чоң зыян келтириши мүмкүн экенин так көрсөтүп берди», – деп кошумчалады вирусолог.

Анын айтымында, акыркы он жылдыктарда жаныбарлардын вирустары адамдарга мурдагыдан алда канча көп жуга баштаган. Ар үч-төрт жылда жаңы вирустар пайда болууда. Алардын катарына атипикалык пневмония, чочко тумоосу, COVID-19, Жакынкы Чыгыш респиратордук синдрому, Эбола ысытмасы жана Зика вирусу кирет. Интенсивдүү мал чарбачылыгы, дүйнөлүк туризмдин өсүшү жана экзотикалык жаныбарлардын соодасы жаңы вирустардын жаныбарлардан адамга жугуу коркунучун арттырып жатат.