Министрлер Кабинетинин Төрагасынын биринчи орун басары Данияр Амангельдиев экспортту өнүктүрүү боюнча кеңештин кезектеги жыйынын өткөрдү. Жолугушуунун негизги максаты өлкөнүн экспорттук дараметин жогорулатуу жана ата мекендик бизнес үчүн эң ыңгайлуу шарттарды түзүү боюнча практикалык чечимдерди иштеп чыгуу болду. Талкууга тиешелүү мамлекеттик органдардын жетекчилери жана бизнес-коомчулуктун өкүлдөрү катышты. 

Данияр Амангельдиев Кыргыз Республикасынын Президентинин тапшырмасына ылайык, улуттук өндүрүүчүлөрдү колдоо Министрлер Кабинетинин ишинин стратегиялык багыты болуп саналарын баса белгиледи. Талкуунун негизги темаларынын бири экспорттоочулардын транспорттук жана логистикалык чыгымдарын жарым-жартылай компенсациялоо боюнча пилоттук долбоорду ишке киргизүү болду.

Бул чара ата мекендик товарлардын тышкы рынокторго жеткирүүдөгү өз наркын кыйла төмөндөтүүгө, алардын атаандаштыкка жөндөмдүүлүгүн жогорулатууга багытталган. Катышуучулар бизнестин финансылык ресурстарга жеткиликтүүлүгүн кеңейтүүгө өзгөчө көңүл бурушту. 

Жыйындын алкагында "Экспорттук келишимди кредиттөө" адистештирилген жеңилдетилген кредиттик линиясы сунушталды. Бул ыкма экспорттоочулардын кассалык үзгүлтүктөрүн ыкчам жабууга жана камсыздандыруу инструменттери жана кепилдиктер менен камсыз кылуу аркылуу жүгүртүү каражаттарын толуктоого багытталган. 

Жыйын ачык баарлашуу форматында өттү, анда ата мекендик компаниялардын өкүлдөрү өз демилгелерин жана көйгөйлүү маселелерин түздөн-түз айтууга мүмкүнчүлүк алышты. Данияр Амангельдиев ишкерлердин бажылык башкарууну жакшыртуу жана техникалык тоскоолдуктарды жоюу боюнча сунуштарын укту.

Жыйынтыгында, Министрлер Кабинетинин Төрагасынын биринчи орун басары тиешелүү мамлекеттик органдарга бир катар конкреттүү тапшырмаларды берди. 

«Бүгүн айтылган бардык демилгелер пилоттук режимде сыналат. Бул этаптын жыйынтыгы боюнча биз бул чаралардын натыйжалуулугуна кылдат талдоо жүргүзөбүз, андан кийин колдоо механизмдери толук масштабдуу режимде туруктуу негизде киргизилет», - деп жыйынтыктады Данияр Амангельдиев.