БУУнун Коопсуздук кеңеши жана Башкы ассамблеясы дүйнөлүк уюмдун жаңы башкы катчысын шайлоо тартибин расмий түрдө баштап, биргелешкен кат таратышты. Бул тууралуу ТАСС агенттиги билдирди.

Тиешелүү документти ноябрда Коопсуздук кеңешине төрагалык кылып жаткан Сьерра-Леоненин БУУдагы туруктуу өкүлчүлүгүнүн басма сөз кызматы жарыялады.

Катта айтылгандай, бул билдирүү «кандидаттарды көрсөтүүнү баштоого, тандоо жана дайындоо процессин ишке киргизүүгө» кызмат кылат.

Биргелешкен катта «дүйнөлүк уюмдун тарыхында бир да жолу аял башкы катчы болуп дайындалбаганы өкүнүч менен белгиленип», мүчө-мамлекеттерге «аялдарды талапкер катары көрсөтүүнү олуттуу кароого» кеңеш берилет.

— Биз башкы катчыны тандоодо региондордун ар түрдүүлүгүнүн маанилүүлүгүн белгилеп кетебиз, — деп да айтылат документте.

БУУ башкы катчылыгына талапкерди уюмга мүчө-өлкөлөр сунуштай алат, ар бир өлкө бир гана талапкер көрсөтүүгө укуктуу. Талапкер көрсөтүү үчүн өлкөлөр Коопсуздук кеңешинин жана Башкы ассамблеянын төрагаларына расмий кат жөнөтүшү керек. Талапкерлер өз кезегинде уюмду өнүктүрүү боюнча өзүнүн көз карашын жана киреше булактарын көрсөтүүгө тийиш. Эгер талапкер БУУнун структурасында иштеп жүргөн болсо, анда «шайлоо кампаниясы учурунда кызыкчылыктардын кагылышына жол бербөө үчүн ишин убактылуу токтотууну карашы керек» деп айтылат.

Башкы катчыны түз шайлоо процесси келерки жылдын июль айынын аягында өтөт деп пландалууда. Азыркы учурда бул кызматка ат салышууга эки киши даяр экенин билдирди — Атом энергиясы боюнча эл аралык агенттиктин башчысы Рафаэль Гросси жана БУУнун Соода жана өнүктүрүү боюнча конференциясынын башкы катчысы Ребекка Гринспан.

Учурдагы башкы катчы Антониу Гутерриштин ыйгарым укуктары 2026-жылдын 31-декабрында аяктайт.

БУУнун башкы катчысы Коопсуздук кеңеши тарабынан тандалып, Башкы ассамблея тарабынан бекитилет. Анын ыйгарым укук мөөнөтү — беш жыл, кайра шайланууга мүмкүнчүлүк бар. Мөөнөт саны боюнча чектөө жок, бирок азыркыга чейин бир да адам бул кызматты 10 жылдан ашык ээлеген эмес. Мындан тышкары, калыптанган тажрыйба боюнча БУУнун башчысы Коопсуздук кеңешинин туруктуу мүчөлөрүнөн — Россия, Улуу Британия, Кытай, АКШ жана Франция өкүлдөрүнөн тандалбайт.