Бишкекте оор жүк ташыган унааларга чектөө киргизилди

Журналист: АЙСАЛКЫН КАСЫМ ТОКАЙ КЫЗЫ

29.05.2026, 16:22

1941

коом

Бишкек шаарында жол коопсуздугун жогорулатуу жана муниципалдык унаа жолдорунун сакталышын камсыздоо максатында оор жүк ташуучу унаалардын кыймылына убактылуу чектөөлөр киргизилди. Бул тууралуу борбор калаанын мэриясынан билдиришти.

Мэриянын тескемесине ылайык, чектөөлөр үстүбүздөгү жылдын 20-майынан 1-октябрына чейин күчүндө болот.

Чектөөнүн шарттары:

күндүз абанын температурасы 28 градус жана андан жогору болгон учурда, саат 09:00дөн 19:00гө чейин чектөө иштейт;
максималдуу жалпы салмагы 18 тоннадан ашкан жүк ташуучу автотранспорт каражаттарынын Бишкектин муниципалдык жолдорунда жүрүүсүнө тыюу салынат.

Бул чектөө кимдерге жайылтылбайт?

Төмөнкү жүктөрдү ташыган унааларга өзгөчө шартта жүрүүгө уруксат берилет:

гуманитардык жардам жана тамак-аш азыктары;
күйүүчү-майлоочу материалдар;
атайын уруксат кагазы бар ири габариттүү жана өзгөчө жүктөр;
унаа жолдорун оңдоо, куруу жана мамлекеттик/коомдук муктаждыктар үчүн объекттерди курууга багытталган жүктөр.
“Бул буйрукту ишке ашыруу максатында Бишкектин төрт районунун акимдерине жеке жана юридикалык жактар арасында түшүндүрүү иштерин жүргүзүү тапшырылды. Ал эми жолдордогу тартипти жана бул тескеменин сакталышын Милициянын кайгуул кызматы менен мэриянын Муниципалдык инспекциясы биргелешип көзөмөлдөйт”,–деп айтылат маалыматта.