"Асман авиакомпаниясы" ЖЧКсы 2026-жылдын 16-апрелинде Бишкек-Ош каттамы боюнча MN-15 каттамына байланыштуу кырдаалды тактап жаткандыгын билдирди.

"Учуу учурунда экипаж кабинадагы коопсуз басымды сактоого жооптуу системадан сигналды аныктаган. Учак өндүрүүчүсү De Havilland Canada компаниясынын белгиленген жол-жоболоруна жана сунуштарына ылайык, экипаж дароо зарыл чараларды көрүп, пландаштырылган түрдө төмөндөөнү баштаган.

Учкучтар жана борт коштоочулары учуунун бардык этаптарында кырдаалды көзөмөлдөөнү камсыз кылып, учуу эрежелеринин чегинде тез жана так иш алып барышты. Жүргүнчүлөр авиакомпаниянын жол-жоболоруна ылайык кычкылтек менен камсыз болушуп, кычкылтек менен камсыздоо системасы кадимкидей иштеп жатты:

Баллондор жакшы абалда болгон жана индикаторлор кадимки иштөө шарттарын көрсөтүп турган. Бортто толук медициналык жардам көрсөтүүчү комплект жана медициналык каражаттар да болгон.

Учак коопсуз конуп, учуудан кийин жүргүнчүлөргө же экипаж мүчөлөрүнө эч кандай терс таасирлер катталган эмес.

Стандарттык техникалык тейлөө жол-жоболоруна ылайык, учак кошумча текшерүүлөр жана зарыл болгон оңдоолорду жүргүзүү үчүн убактылуу пайдалануудан алынып салынды.

Учурда басым системасынын иштешинин себебин текшерүү жана техникалык иликтөө жүрүп жатат. Жыйынтыктардын негизинде кошумча маалымат берилет.

"Asman Airlines" авиакомпаниясы жүргүнчүлөрдөн келтирилген ыңгайсыздыктар жана бул кырдаалдан улам келип чыккан ар кандай тынчсыздануулар үчүн чын жүрөктөн кечирим сурайт. Биз мындай окуялар кооптонууну жаратышы мүмкүн экенин түшүнөбүз жана жүргүнчүлөрүбүздүн коопсуздугуна жана ыңгайлуулугуна абдан олуттуу карайбыз. Компания окуяны кылдат иликтөө жана келечекте ушул сыяктуу кырдаалдардын алдын алуу үчүн бардык зарыл чараларды көрүп жатат. Учуулардын коопсуздугу биздин эң башкы артыкчылыгыбыз бойдон калууда", - деп билдирди аталган компания.

Эске сала кетсек, Бишкектен Ошко учкан Asman Airlines авиакомпаниясынын учагында кычкылтек жетишсиз болуп, салондо кыска мөөнөттүү дүрбөлөң жаралган. Бул тууралуу жүргүнчү Эртуран Разаков жана экс-депутат надира Нарматова өзүнүн социалдык тармагына жазып чыккан эле. 

Анын айтымында, 16-апрелде саат 18:10догу каттамда учакта 20га жакын жүргүнчү, анын ичинде кичинекей балдар да болгон. Учуу учурунда кычкылтек деңгээли жетишсиз болуп, айрым жүргүнчүлөрдө дүрбөлөң жана абалдын начарлашы байкалган.

Жүргүнчүнүн билдирүүсүндө учакта кычкылтек баллондорунун бири иштебей калганы жана жабдуулар жетиштүү текшерүүдөн өтпөгөнү айтылат. Окуя болжол менен 10 мүнөткө созулган.

Ошол эле рейсте мурдагы депутат да болгондугу жана айрым жүргүнчүлөргө медициналык жардам каражаттары берилбегени тууралуу маалыматтар да социалдык тармактарда айтылууда.

Ал эми Кыргызстан аэропорттору жана Asman Airlines бул окуя боюнча расмий иликтөө жүрүп жатканын билдиришти.