Министрлер кабинетинин мурдагы төрагасы Акылбек Жапаров Бостери айылында өткөн VII Кыргыз-Россия экономикалык форумунда сүйлөп, Борбор Азия өлкөлөрүнүн алдында турган негизги экономикалык чакырыктар тууралуу пикирин билдирди.

Ал акыркы беш жылда Кыргызстандын экономикасы жылына 9–10 пайыздык өсүштү көрсөтүп жатканын белгилеп, өлкөнүн жетишкендиктери көп учурда Азия мамлекеттеринин ийгиликтеринин көлөкөсүндө калып жатканын айтты.

Жапаровдун айтымында, учурда чечимдерди ыкчам кабыл алуу өлкөнүн атаандаштыкка жөндөмдүүлүгүнүн негизги факторуна айланды. Ал буга чейин айткан сөзүн кайталап, «мурда чоң балык кичине балыкты жесе, бүгүн ылдам балык жай балыкты жейт» деген ойду баса белгиледи.

Анын айтымында, президент Садыр Жапаровдун жетекчилиги алдында көп жылдан бери чечилбей келген ири долбоорлор ишке ашырыла баштады. Алардын катарында Кытай–Кыргызстан–Өзбекстан темир жолу, Камбар-Ата ГЭС-1 жана башка транспорттук, энергетикалык жана инфраструктуралык долбоорлор бар.

Ошол эле учурда экс-премьер азыркы дүйнөдө ылдамдык гана жетишсиз экенин белгилеп, экономика тышкы соккуларга туруктуу болушу керектигин айтты. Ал логистикалык платформалардагы үзгүлтүктөр же күйүүчү май рыногундагы өзгөрүүлөр бир эле өлкөгө эмес, бүтүндөй аймакка таасир этерин мисал келтирди.

Жапаров Борбор Азия үчүн дүйнөлүк соода багыттарынын өзгөрүшү жаңы мүмкүнчүлүктөрдү түзүп жатканын белгилеп, бул мүмкүнчүлүктөрдү өз убагында пайдалануу зарылдыгын кошумчалады. Анын пикиринде, XXI кылымда мамлекеттердин башкы артыкчылыгы – тобокелчиликтерди алдын ала көрө билүү, ыкчам чечим кабыл алуу жана убакытты текке кетирбөө болуп саналат.