Central Afghanistan булагынын маалыматына ылайык, Бадахшан провинциясында «Талибан» кыймылынын борбордук жетекчилиги менен таасирдүү талаа командири Жума Хан Фатехтин ортосундагы тиреш күчөдү. Талибандардын кошумча бөлүктөрү Фатехтин негизги таяныч базасы болуп эсептелген Нуси районунун административдик борборуна кирди.

Келген күчтөрдүн негизги милдети — Фатехке баш ийген куралдуу түзүмдөрдү куралсыздандыруу жана Кабулдун райондогу толук көзөмөлүн калыбына келтирүү. Аскерлердин жайгаштырылганына карабастан, азырынча ачык кагылышуулар катталган жок. Маалыматтарга ылайык, Фатех өз жоокерлерине өкмөттүк күчтөрдүн жылышына тоскоол болбоого жана ок ачпоого буйрук берген. Ошол эле учурда анын отряддары бир катар калктуу конуштардагы позицияларын сактап, күжүрмөн даярдык абалында калууда.

Чыр-чатактын негизги себептеринин бири катары алтын кендерин көзөмөлдөө үчүн күрөш аталууда. Буга чейин талибандардын жетекчилиги пайдалуу кендерди мыйзамсыз казууга тыюу салган, бул жергиликтүү талаа командирлеринин каржылык кызыкчылыктарына терс таасирин тийгизген.

Кырдаалдын курчушуна байланыштуу кыймылдын коргоо министри Мохаммад Якуб Бадахшандын бир катар чек ара райондоруна, анын ичинде Вахан коридоруна жана Тажикстан, Кытай жана Пакистан менен чектеш аймактарга барды.

Мындан тышкары, «Талибан» нааразы болгон талаа командирлери менен сүйлөшүү жүргүзүү үчүн атайын комиссия түзүп, ири куралдуу кагылышууга жол бербөөгө аракет кылууда. Чыңалууну азайтуу максатында аймакка 50 миллион афгани бөлүнүп, маалыматтарга караганда, бул каражаттын бир бөлүгү жергиликтүү лидерлерге таратылган.

Ошол эле учурда талибандар чек арадагы исмаилит жамааттарынан жаштарды өзүнүн куралдуу түзүмдөрүнө тартууну күчөтүп, стратегиялык мааниге ээ болгон бул аймактагы позицияларын бекемдөөгө аракет кылып жатышат.