Президент Садыр Жапаров соттук өкүлчүлүк маселелери боюнча айрым мыйзам актыларына өзгөртүүлөрдү киргизген мыйзамга кол койду. Бул тууралуу президенттин администрациясы билдирди.

Мыйзам долбоору Жогорку Кеңеште каралып жаткан учурда эки жолу күн тартибинен алынган. Буга карабастан, 2026-жылдын 24-июнунда парламент документтин демилгечилери менен пикир келишпестиктерге карабай аны үчүнчү окууда кабыл алган.

Документ жарандарга жана юридикалык жактарга көрсөтүлүүчү юридикалык жардамдын сапатын жогорулатууга, ошондой эле сотто өкүлчүлүк кылган адистердин ишмердүүлүгүнүн бирдиктүү эрежелерин белгилөөгө багытталган.

Мыйзам менен биринчи жолу юридикалык өкүлдүн укуктук макамы мыйзам деңгээлинде бекитилет. Ошондой эле мындай адистердин кесиптик даярдыгына, квалификациясына жана квалификациясын жогорулатууга бирдиктүү талаптар киргизилип, юридикалык өкүл макамын алуу, токтотуу жана андан ажыратуу тартиби аныкталат.

Мындан тышкары, юридикалык өкүлдөрдүн реестри түзүлөт. Алар үчүн кесиптик этиканын, дисциплинардык жоопкерчиликтин жана юридикалык сырды сактоонун бирдиктүү стандарттары белгиленет.

Мыйзамга ылайык, юридикалык өкүлдөр мыйзамда белгиленген ыйгарым укуктардын чегинде адвокаттар менен бирдей негизде жарандык, административдик сот өндүрүшүнө жана укук бузуулар жөнүндө иштерди кароого катыша алышат.

Документ ошондой эле Юстиция министрлиги менен Кыргыз Республикасынын Адвокатурасынын юридикалык өкүлдөрдүн ишмердүүлүгүн жөнгө салуудагы ыйгарым укуктарын аныктайт. Мындан сырткары, Юстиция министрлигине тиешелүү адистер жетишсиз болгон аймактарда жарандардын квалификациялуу юридикалык жардамга жеткиликтүүлүгүн камсыздоо максатында юридикалык өкүлдөргө коюлган айрым талаптарды убактылуу колдонбоо тартибин аныктоо укугу берилет.

Мындан тышкары, мыйзам мамлекеттик кепилденген юридикалык жардам системасына юридикалык өкүлдөрдүн катышуусу үчүн укуктук негиздерди түзөт.