АКШдагы эң кургак жана эң ысык аймак катары таанылган Өлүм өрөөнү (Death Valley) күтүүсүз табигый көрүнүшкө туш болду. Акыркы айларда жааган рекорддук жаан-чачындардын натыйжасында бул аймакта миңдеген жылдардан бери жок болуп кеткен Манли көлү кайрадан жарым-жартылай пайда болду.

Сентябрдан ноябрга чейин Өлүм өрөөнүндө 6 сантиметрден ашуун жаан жааган. Кадимки шартта жылына 5 сантиметрден да аз жаан түшкөн бул аймак үчүн мындай көрсөткүч климаттык аномалия катары бааланууда. Айрыкча ноябрь айында жаан-чачын рекорддук деңгээлге жетип, ландшафтты түп-тамырынан өзгөрттү.

Натыйжада миң жылдык көл кайра жанданды. Узакка созулган жаандын айынан акыркы муз доорунан кийин болгон Манли көлүнүн орду кайра суу менен капталды. АКШнын Улуттук парктар кызматынын маалыматына караганда, бул жерде 10 миң жылдан ашык убакыттан бери туруктуу суу болгон эмес. Көл толук калыбына келген жок. Суунун деңгээли көп жерлерде бут кийимдин бийиктигинен ашпайт. Ошентсе да, бул көрүнүш табияттын өткөн тарыхын эске салган сейрек окуя катары бааланууда.

Манли көлүнүн убактылуу кайтып келиши буга чейин да болгон. 2023-жылы “Хилари” бороонунан кийин көл кыска мөөнөткө пайда болуп, кайра кургап кеткен. Адистер мындай көрүнүштөр климаттын өзгөрүшүнө пустиня экосистемасынын канчалык сезимтал экенин көрсөтөт дешет.

Өлүм өрөөнүндө Манли көлүнүн кайрадан пайда болушу, табияттын күтүүсүз күчүн жана климаттык өзгөрүүлөрдүн таасирин айкын көрсөткөн көрүнүш. Миң жылдык тарых жер бетине чыгып, адамзатка табият менен эсептешүүнүн зарылдыгын дагы бир жолу эскертти.

Булак: NazarNews