Ушул күндөр аралыгында Кытай Эл Республикасынын Пекин жана Шинжаң шаарларында «China Closer» медиа-туру өтүп жатат.

Аталган медиа-турдун алкагында Турпан музейине саякат уюштурулду. Бул тууралуу жеринен "NazarNews" маалымат агенттигинин жетекчиси Гүлжан Шерипбаева билдирди.

Турпан музейи — миң жылдык тарыхты камтыган байыркы казына.

Кытайдын Шинжаң-Уйгур автоном районунун Турпан шаарында жайгашкан борбордук музей – бул миңдеген жылдарды камтыган тарыхтын жандуу күбөсү. Бул жай — палеолит доорунан бүгүнкү күнгө чейинки маданий, археологиялык жана жаратылыш табылгаларын чогулткан аймактагы эң маанилүү музейлердин бири.

Уникалдуу коллекциясы менен айырмаланат

Турпан музейи жалпы 5 миңден ашуун табылгаларды өзүнө камтыйт. Алардын баары Турпан ойдуңунда жүргүзүлгөн археологиялык казуулар учурунда табылган. Бул музей — Шинжаңдагы экинчи орундагы эң ири коллекцияга ээ болгон мекеме болуп эсептелет.

Музейдин үч негизги багыты:

1. Тарыхый табылгалар залы

Бул бөлүм тарыхый мезгилдер боюнча сегиз тематикалык секцияга бөлүнгөн. Бул жерден керамикалык идиштерди, байыркы жазма документтерди, зыгыр жана жибек кездемелерди, жыгач оюмдарын жана жадагалса кургатылган мөмө-жемиштерди да көрүүгө болот. Жазмалар ар кандай тарыхый жазуу системалары менен жазылган: согду, уйгур, санскрит, хань жана башкалар. Бул табылгалар — Турпандын байыркы доорлордон бери соода, маданият жана цивилизациянын борбору болгонун тастыктаган күбөлөр.

2. Мумиялар экспозициясы

Музейдин эң сырдуу жана таасирдүү бөлүгү — байыркы мумиялар залы. Бул бөлүмдө 11 мумия көрсөтүлгөн, алардын кээ бирлери 2 миң жыл мурунку убакытка таандык. Аталган мумиялар Турпандын кургак жана шамалдуу климатынын аркасында табигый жол менен сакталып калган. Айрыкча генерал Чжан Сюнь жана анын жубайынын толук жана бүтүн мумиясы – музейдин эң баалуу экспонаттарынын бири.

3. Байыркы мурундуу жаныбардын сөөктөрү (носорог)

Бул экспозицияда 20–30 миллион жыл мурун жашаган ири сүт эмүүчүнүн, чоң мурундуу жаныбардын толук сөөк курамы коюлган. Бул дүйнө жүзүндөгү эң жакшы сакталып калган толук ископаемый жаныбар сөөктөрүнүн бири катары таанылган жана музейдин сыймыгы болуп саналат.

Турпан музейи — убакытты артка түрө алган терезе

Бул музей Улуу Жибек жолунун маданий жана соода тарыхы менен кызыккан ар бир адам үчүн эң сонун булак. Археология, этнография, тарых же жаратылыш илимдери менен кызыккандардын бардыгы бул жерден өзүнчө дүйнөнү таба алат.

Эгер сиз Турпан шаарына барууну пландап жатсаңыз, анда Турпан музейине сөзсүз баш багып көрүңүз. Анткени бул жер — тарых менен табияттын түйүшкөн чекитиндеги өзгөчө дүйнө.

Эске сала кетсек, 2025-жылдын 12–23-июну аралыгында Кытай Эл Республикасынын Пекин жана Шинжаң шаарларында «China Closer» медиа-туру өтүп жатат. Ага Кыргызстандан NazarNews маалымат агенттигинин башкы редактору Гүлжан Шерипбаева катышууда.

Медиа-турдун максаты — Кытайдын аймактык өнүгүүсүн, маданиятын жана жаңы технологиялык жетишкендиктерин эл аралык журналисттерге жана медиа өкүлдөрүнө таанытуу.

Иш-чаранын уюштуруучусу - CCTV (CCTV+) видеомаалымат агенттигинин президенти, башкы директору жана башкы редактору Гао Вэй.

Аталган иш- чарага Кыргызстан, Өзбекстан, Казакстан, Тажикстан, Пакистан, Гана, Африка, Эфиопия, Мьянма, Лаос, Мазамбик, Сауд Арабия, Ирак ж.б. өлкөлөрдүн медиа өкүлдөрү катышууда. Ага Кыргызстандан NazarNews маалымат агенттигинин башкы редактору Гүлжан Шерипбаева чакырылган.