Иран дүйнөлүк энергетикалык рынокто олуттуу кризис жаралышы мүмкүн экенин эскертти. Өлкөнүн аскердик жетекчилигинин өкүлү Ибрагим Золфагаринин айтымында, аймактагы коопсуздук абалы өзгөрбөсө, мунайдын баасы баррелине 200 долларга чейин көтөрүлүшү мүмкүн.

Маалыматтарга караганда, Иран күчтөрү Ормуз кысыгына жакын аймакта бир нече соода кемелерине ок чыгарышкан. Натыйжада Таиланддын желеги астында жүргөн жүк ташуучу кеме өрттөнүп, олуттуу зыян тарткан. Кеменин экипажы эвакуацияланган, бирок үч адам дайынсыз болууда.

Мындан тышкары, Япониянын жана Маршалл аралдарынын желеги астындагы башка кемелер да снаряддардын тийишинен жабыркаганы кабарланууда.

Алдын ала маалыматтар боюнча, аймактагы согуш башталгандан бери жабыркаган соода кемелеринин саны 14кө жеткен. Ормуз кысыгындагы кеме жүрүүнүн коопсуздугунун бузулушу 1970-жылдардагы мунай кризисинен берки дүйнөлүк энергетикалык рынок үчүн эң чоң коркунучтардын бири катары бааланууда.
Эл аралык энергетикалык агенттик кырдаалды турукташтыруу үчүн дүйнөлүк стратегиялык запастардан 400 миллион баррель мунай чыгарууну сунуштады. Бирок эксперттер Ормуз кысыгы жабылып калса, бул дүйнөлүк мунай жеткирүүлөрүнө олуттуу сокку урушу мүмкүн экенин белгилешүүдө.

Азыркы учурда мунайдын баасы баррелине болжол менен 90 доллардын айланасында. Ошентсе да, ирандык расмий өкүлдөр аймактагы согуш узакка созулса, дүйнөлүк экономика чоң шокко туш болушу мүмкүн экенин белгилешти.