Кыргыз Республикасынын Энергетика министрлиги коррупцияга каршы мамлекеттик саясатты ишке ашыруу боюнча системалуу иштерди жүргүзүп жатканын билдирди.

Маалыматка ылайык, Президенттин 2025–2030-жылдарга карата коррупцияга каршы мамлекеттик стратегиясын ишке ашыруунун алкагында министрликтин ведомстволук иш-чаралар планы бекитилип, ага 2026-жылы тиешелүү өзгөртүүлөр киргизилген.

Министрлик стратегиянын аткарылышы боюнча маалыматтарды белгиленген мөөнөттөрдө Кыргыз Республикасынын Башкы прокуратурасына үзгүлтүксүз жөнөтүп келет. Ошондой эле 2026–2027-жылдарга карата коррупцияга каршы маалыматтык саясаттын мамлекеттик программасын ишке ашыруу боюнча өзүнчө иш-чаралар планы кабыл алынган.

Коррупциянын алдын алуу максатында жарандардын кайрылууларын талдоо тартиби иштелип чыгып, учурда бекитүү баскычында турат. Мындан тышкары, министрликтин коррупцияга каршы иш-чаралар пландары жана алардын аткарылышы боюнча отчеттору расмий сайтка жайгаштырылган.
Коррупциялык тобокелдиктерди аныктоо, баалоо жана башкаруу боюнча жумушчу топ түзүлүп, министрликте жана анын ведомстволук бөлүмдөрүндө коррупциялык коркунучтар жаралышы мүмкүн болгон жагдайлардын тизмеси даярдалып, макулдашуу үчүн Башкы прокуратурага жөнөтүлгөн.

Министрликтен билдиришкендей, ички ченемдик жана уюштуруучулук документтер дагы өркүндөтүлүп, коррупциянын алдын алуу боюнча ыйгарым укуктуу өкүл менен тыгыз кызматташтык улантылууда.
Жалпысынан министрлик коррупциялык тобокелдиктерди азайтуу жана алардын алдын алуу боюнча комплекстүү иштерди жүргүзүп жатканын белгиледи.