АКШ Ормуз кысыгына жакын жерде үч соода кемесине жасалган чабуулга жооп катары Ирандагы бир катар аскердик объектилерге кайрадан ракеталык сокку урду. Маалыматка караганда, 80ден ашуун бута, анын ичинде абадан коргонуу системалары, жээк радарлары, ракета комплекстери жана дрон учуруучу жайлар бутага алынган.

Ошондой эле Вашингтон Иранга мунай сатууга уруксат берген лицензияны жокко чыгарды.

Axios басылмасынын маалыматына ылайык, Иранга сокку уруу планын АКШнын президенти Дональд Трамп бекитип, аны ишке ашыруу тууралуу буйрукту Түркияда өткөн НАТО саммитинде жүргөн учурда берген.

Ирандын башкы сүйлөшүүчүсү Мохаммад-Багер Галибаф X социалдык тармагындагы баракчасына мунайга карата санкциялардын кайра киргизилиши, өлкөнүн түштүгүнө жасалган чабуулдар жана жаңы соккулар тууралуу коркутуулар Тегерандын позициясын өзгөртпөй турганын жазды.
«Коркутуу жана басым көрсөтүү доору аяктады. Бул эч кандай жыйынтык бербейт. Биз багынбайбыз», — деди ал.

Тегеран Ирандын Куралдуу күчтөрү агрессияга «катуу жооп кайтарарын» жана эч кандай шартта Ормуз кысыгын башкарууга тышкы кийлигишүүгө жол берилбей турганын билдирди.

Ал арада Кувейттин армиясы өлкөнүн абадан коргонуу күчтөрү ракета жана учкучсуз учактар аркылуу жасалган чабуулдарды кайтарып жатканын маалымдады.

Буга чейин АКШ менен Ирандын өкүлдөрүнүн кыйыр сүйлөшүүлөрүнүн кезектеги айлампасы 28-февралда каза болгон Ирандын жогорку лидери Али Хаменейди акыркы сапарга узатуу зыйнаты аяктагандан кийин өтөрү кабарланган.

Али Хаменей менен коштошуу иш-чаралары 4–9-июль күндөрү өлкөнүн ар кайсы аймактарында өтүп жатат. Аны жерге берүү зыйнаты 9-июлда Мешхед шаарында өтөт.