Министрлер кабинетинин төрагасы Адылбек Касымалиев Кыргыз Республикасынын Куралдуу Күчтөрүнүн 34 жылдыгына арналган салтанаттуу аземге катышты. Бул тууралуу өкмөттүн басма сөз кызматы билдирди.

Иш-чаранын жүрүшүндө Адылбек Касымалиев аскер кызматкерлерин, Куралдуу Күчтөрдүн ардагерлерин жана жалпы катышуучуларды бүгүнкү мааракелүү окуя менен куттуктап, мамлекеттин эгемендүүлүгүн, аймактык бүтүндүгүн жана коопсуздугун камсыз кылууда улуттук армиянын ролу зор экенин белгиледи.

Ал өз сөзүндө Кыргыз Республикасынын Куралдуу Күчтөрүн түзүү эгемендүү мамлекеттин өнүгүүсүндөгү чечүүчү этап болгонун баса белгиледи. Армияны түзүүнүн татаал жолуна карабастан, Куралдуу Күчтөр даңктуу салттардын уландысын сактап, потенциалын ырааттуу түрдө чыңдап келе жатканы белгиленди. 

МинКаб Төрагасы улуттук Куралдуу Күчтөрдү түзүүгө демилгечи болгон армиянын ардагерлерине жана аскер башчыларына ыраазычылык билдирип, алардын өлкөнүн коргонуу жөндөмдүүлүгүн өнүктүрүүгө жана чыңдоого кошкон салымын баса белгиледи.

Анын сөзүндө армияны модернизациялоого өзгөчө көңүл бурулду. Акыркы жылдары өлкөнүн экономикасынын туруктуу өнүгүшүнүн жана мамлекет жетекчилигинин колдоосунун аркасында Куралдуу Күчтөрдү заманбап курал-жарактар, авиация, абадан коргонуу системалары, автомобиль жана бронетехника, ошондой эле байланыш жана материалдык-техникалык жабдуулар менен жабдуу боюнча масштабдуу иш-чаралар ишке ашырылып жатканы белгиленди.

Адылбек Касымалиев коргонуу жөндөмдүүлүгүн чыңдоо менен бирге мамлекет аскер кызматкерлеринин социалдык жактан камсыз болушуна артыкчылык берип жатканын белгиледи. Өлкө боюнча жаңы турак-жай имараттары, аскер шаарчалары, казармалар курулуп, аскер кызматчыларынын жана алардын үй-бүлөлөрүнүн кызмат өтөө жана жашоо сапатын жакшыртуу үчүн зарыл шарттарды түзүүдө.

Ал өз сөзүндө ошондой эле жаштар арасында аскердик кызматтын кадыр-баркы өсүп баратканын белгилеп, аскер кызматын өтөөгө умтулган жаш жарандар көбөйүп жатканын кошумчалады. 

МинКаб Төрагасы белгилегендей, Кыргызстан тынчтыкты сүйгөн тышкы саясатты карманып, жакшы коңшулук мамилелерди жана эл аралык кызматташтыкты, анын ичинде КМШ, ЖККУ, ШКУ жана башка эл аралык уюмдардын алкагында өнүктүрөт. Буга байланыштуу биргелешкен эл аралык аскердик машыгуулардын жана аймактык коопсуздукту чыңдоонун маанилүүлүгү белгиленди.

Сөзүн жыйынтыктап жатып, Адылбек Касымалиев Кыргыз Республикасынын Куралдуу Күчтөрү өлкөнүн коопсуздугун ишенимдүү камсыз кылууга жана мамлекеттин улуттук кызыкчылыктарын коргоого жөндөмдүү экенине ишенерин билдирди.

Аскер кызматчыларына чын дилден кызмат өтөгөндүгү үчүн ыраазычылык билдирип, аларга жана алардын үй-бүлөсүнө бекем ден соолук, бакубатчылык жана келечектеги Мекендин жыргалчылыгы үчүн кызматында ийгиликтерди каалады.