Түркиянын Стамбул шаарынын мурдагы мэри Экрем Имамоглуна каршы жаңы сот иши башталды. Эгер айыптоолор толугу менен далилденсе, ал 2430 жылга чейин эркинен ажыратылышы мүмкүн.

Маалыматтарга караганда, айыптоо актысы 3900 беттен турат жана анда 142 берене камтылган. Алардын арасында кылмыштуу уюм түзүү, паракорчулук жана мамлекеттик мүлктү уурдоо сыяктуу айыптар бар. Бул тууралуу Hurriyet Daily News басылмасы жазды.

Соттун биринчи отурумунда судья процессти убактылуу токтотуп, Имамоглуга билдирүү жасоого уруксат берген эмес. Ал сот залында «өзүн коргогон адамдардын укуктарын сыйлоого» чакыргандан кийин, судья залдан чыгып кеткен. Андан соң бардык катышуучулардан залдан чыгуу талап кылынган. Кийинчерээк сот отуруму кайра уланды.

Сот процессине байланыштуу имараттын айланасында катуу коопсуздук чаралары көрүлдү. Сот имаратынын 1 чакырым радиусунда нааразычылык акцияларын өткөрүүгө тыюу салынды. Ошол эле учурда Имамоглунун көптөгөн жактоочулары сот имаратынын жанындагы тосмолордун артына чогулушту.

Залда саясатчынын туугандары жана оппозициялык Республикалык элдик партиянын (CHP) лидери Өзгүр Өзел да болгон.

Экрем Имамоглу 2025-жылдын март айында коррупция боюнча айыпталып камакка алынган. Ал өзүнө коюлган айыптоолорду четке кагып, бул ишти саясий кысым катары баалаган.

Имамоглу Түркиянын президенти Режеп Тайип Эрдогандын негизги саясий атаандаштарынын бири катары каралып келген. Анын камакка алынышы өлкөнүн бир катар шаарларында массалык нааразылык акцияларын жараткан.

2025-жылдын июль айында Экрем Имамоглу прокурорду кемсинтти жана коркутту деген айып менен 1 жыл 8 айга эркинен ажыратылган.

Учурда бул коррупциялык иш боюнча 400гө жакын адам айыпталууда. Алардын арасында Стамбул, Анталия, Бурса жана башка шаарлардын мэрия кызматкерлери, ишкерлер жана журналисттер бар.