Орус аскерлери бир айдан ашык ээлеп турган Буча шаарында ондогон, балким жүздөгөн жайкын тургун набыт болгону кабарланууда. Украин аскерлери шаарга 1-апрелде киргенден кийин соцтармактарда Бучадагы көчөдө өлүп жаткан адамдардын денелери тартылган сүрөттөр менен видеолор пайда болду.

Ишембиде шаарга кирген Reuters жана AFP агенттигинин кабарчылары да көчөлөрдө курман болгон жай тургундардын денелери көп экенин ырастаган.

Өлгөндөрдүн айрымдарын туугандары тааныган. Алардын көпчүлүгү минага жарылып набыт болсо, арасында башына атылган октон, колдору таңылган боюнча өлгөндөрү да бар экени айтылууда. Украин президентинин кеңешчиси Михаил Подоляк аларды орус аскерлери өлтүргөн деген божомолун Twitter баракчасына жазды. Буча шаарынын мэри 300дөй адам бир мүрзөгө коюлганын билдирди.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн «Украинаны демилитаризация жана денацификация» жасап жана Донбасстагы «жай жашоочулардын канына забын болгондорду» аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg