Жыл башынан ноябрь айына чейин Кытайдын негизги экономикалык аймактарында тышкы соода туруктуу өсүштү көрсөттү. Бул аймактарга Янцзы дарыясынын дельтасы, Гуандун–Сянган–Аомэнь «Чоң булуң» аймагы жана Пекин–Тяньцзинь–Хэбэй региону кирет. Бул тууралуу NazarNews агенттигине кытайлык CCTV-plus агенттиги кабарлады.

Январь–ноябрь айларында материктик Кытайга таандык «Чоң булуң» аймагындагы тогуз шаарда тышкы сооданын жалпы көлөмү 8,3 трлн юаньды (болжол менен 1,2 трлн АКШ долларын) түздү. Бул көрсөткүч өткөн жылдын ушул мезгилине салыштырмалуу 4,6 пайызга өсүп, акыркы 11 айдагы тарыхый рекорд болду.

Импорттолгон жана экспорттолгон товарлардын болжол менен 70 пайызы машина куруу жана электрондук продукциялардан турат. Экспорттун негизин электрондук компоненттер, компьютерлер жана аларга тиешелүү тетиктер сыяктуу жогорку технологиялык товарлар түздү.

Өндүрүш каражаттарынын, анын ичинде интегралдык схемалардын жана жарым өткөргүчтөрдү чыгарууга керектелүүчү жабдуулардын импорту олуттуу өстү. Ошол эле учурда балык чарба азыктары жана сүт азыктары сыяктуу керектөөчү товарлардын импорту 20 пайыздан ашык көбөйдү.

Январь–ноябрь айларында Янцзы дарыясынын дельтасы аймагындагы импорт жана экспорттун жалпы көлөмү 15,46 трлн юаньга жетип, жылдык өсүш 6,2 пайызды түздү. Айрыкча «Бир алкак – бир жол» демилгесине катышкан өлкөлөр менен болгон соода жүгүртүү 11 пайызга өстү.

Ал эми Пекин–Тяньцзинь–Хэбэй аймагында алгачкы 11 айда тышкы сооданын жалпы көлөмү 4,3 трлн юаньды түздү. Экспорт 1,32 трлн юаньга жетип, бул мезгил үчүн тарыхый рекорд катары катталды.

Белгилей кетсек, улуттук ишканалардын экспорту алгач ирет 600 млрд юаньдан ашып, 16,1 пайызга өстү. Натыйжада алардын үлүшү аймактагы жалпы экспорттун 47,4 пайызын түздү.