Европа комиссиясынын төрайымы Урсула фон дер Ляйен блок төрт жылдын ичинде экинчи ири энергетикалык кризиске туш болуп жатканын билдирип, таза энергияга тезирээк өтүүгө жана казылып алынган отунга көз карандылыкты азайтууга чакырды.

Фон дер Ляйен 28-февралда АКШ менен Израилдин Иранга каршы согушу башталгандан бери Европа мунай жана газ импорту үчүн кошумча 32 миллиард доллар төлөөгө аргасыз болгонун билдирди.

Дүйшөмбү күнү Берлинде өткөн маалымат жыйынында сөз сүйлөгөн фон дер Ляйен Европа акыркы төрт жылдагы экинчи олуттуу энергетикалык кризисти башынан кечирип жатканын жана Европа Биримдигине мүчө мамлекеттер мындан сабак алышы керектигин айтты.

Европа Биримдиги комиссиясынын төрайымы: "2022-жылы (Орусиянын президенти Владимир) Путин газ менен камсыздоону токтотту, эми кезек Ормуз кысыгына келди. Импорттолгон казылып алынган отунга болгон катуу көз карандылыгыбыз бизди алсыз кылат. Биз бул көз карандылыкты азайтышыбыз керек", - деди.

Фон дер Ляйен Европа өлкөлөрү ишенимдүү энергияны камсыз кылуу үчүн кайра жаралуучу энергия булактарын өндүрүүнү кеңейтип, чакан модулдук реакторлорду кошо алганда, ядролук инновацияларды изилдеши керектигин айтты.

«Бул жерде өндүрүлгөн ар бир киловатт-саат энергия экономикалык туруктуулукка, жеткиликтүү энергияга жана ошондой эле Европанын көз карандысыздыгына салым кошот», - деди Фон дер Ляйен.

Иранга каршы санкциялардын жумшартылышы жөнүндө ачык билдирүү берген Европа Биримдигинин комиссиясынын төрайымы: «Биз санкцияларды алып салууга али эрте деп ойлойбуз. Санкцияларды алып салуудан мурун Иранда өзгөрүүнү, түп-тамырынан бери өзгөрүүнү көрүшүбүз керек», - деди.