ВИЧке каршы күрөшүү боюнча эл аралык программаларды каржылоонун кыскарышы дүйнөдө эпидемиянын кайра күчөшүнө алып келиши мүмкүн. Бул тууралуу 27-июлда Бириккен Улуттар Уюмунун ВИЧ/СПИД боюнча Биргелешкен программасынын (UNAIDS) баяндамасында айтылган.

«Көптөгөн өлкөлөр тарабынан ВИЧке каршы күрөшүүгө бөлүнгөн эл аралык каржылоо 1,5 миллиард доллардан ашык кыскарып, 2024-жылдагы 8,8 миллиард доллардан 2025-жылы 7,3 миллиард долларга чейин төмөндөгөн. Бул 18% азайууну түзөт жана акыркы жыйырма жылга жакын убакыттагы эң төмөнкү көрсөткүч болуп саналат», — деп белгиленет баяндамада.

Маалыматка ылайык, 2025-жылы ВИЧ жуктурган жаңы учурлардын саны 1,2 миллионго жеткен. Ал эми СПИДге байланыштуу оорулардан болжол менен 570 миң адам каза болгон. Глобалдык максаттар аткарылбай жаткандыктан, кырдаал тынчсызданууну жаратууда. Эгерде зарыл чаралар көрүлбөсө, 2030-жылга чейин дагы 3 миллиондон ашык адам ВИЧ вирусун жуктуруп алышы мүмкүн.

Изилдөөлөр көрсөткөндөй, ВИЧтин алдын алуу боюнча программалардын көпчүлүгү эл аралык булактардан каржыланып келген. Маселен, Сахаранын түштүгүндөгү Африка өлкөлөрүндө мындай программалардын каражаттарынын 80%ы чет өлкөлүк жардамдын эсебинен камсыздалган. 2024-жылы жергиликтүү жамааттар менен иштеген уюмдар ВИЧке каршы күрөшүү үчүн чет өлкөлүк каржылоонун 25%ына чейин алышкан.

Эгер донорлордун колдоосу дагы кыскарып, ал эми ички каржылоо көбөйтүлбөсө, ВИЧтин алдын алуу жана дарылоо боюнча көптөгөн жергиликтүү программалар олуттуу кыйынчылыктарга туш болушу мүмкүн.