Евразиялык экономикалык комиссиянын энергетика жана инфраструктура министри Арзыбек Кожошев «Интеграция» эл аралык форумунда Евразия экономикалык бирлигине мүчө мамлекеттердин туруктуу өнүгүүсү үчүн транспорт-логистикалык инфраструктуранын маанилүү экенин белгиледи.

"Глобалдык жөнгө салуу системасы өзгөрүп, туруксуздук күчөп жаткан шартта, транспорт тармагы өндүрүш менен керектөө ортосундагы туруктуу байланышты камсыздаган негизги фактор бойдон калууда. ЕАЭБ ичиндеги транспорттук байланышуу Бирликке мүчө мамлекеттер үчүн олуттуу атаандаштык артыкчылыгын түзөт.

Транспорт жаатындагы интеграциялык негиз буга чейин эле калыптанган: Бирлик алкагында уруксатсыз автотранспорттук ташуулар жүргүзүлөт, темир жол ташуулары боюнча бирдиктүү тариф киргизилген, транспорттук көзөмөл ЕАЭБдин сырткы контуруна чыгарылган.

Интеграциянын оң таасири статистика менен да тастыкталат. 2024-жылдын жыйынтыгы боюнча бардык транспорт түрлөрүнүн жүк айланмасы 6,2 трлн тонна-километрге жетип, ал эми жүргүнчү айланмасы 7,1% көбөйүп, 652,1 млрд жүргүнчү-километрди түздү.

Өнүктүрүүнүн негизги стратегиялык багыттарын белгиледим:

• транспорт тармагын санариптештирүү, анын ичинде e-CMR жана ЦИМ/СМГС бирдиктүү жүк накладнойлорун киргизүү;

• 2027-жылга чейин «тешик» орундарды жоюу жана өткөрмө пункттарын макулдашылган тартипте өнүктүрүү;

• артыкчылыктуу инфраструктуралык долбоорлорду ишке ашыруу;

• евразиялык транспорт коридорлорун өнүктүрүү боюнча Комплекстүү планды аткаруу;

• «Түндүк–Түштүк» эл аралык транспорт коридорун өнүктүрүү.

Белгилеп кеттим: евразиялык транспорт коридорлорунун узундугу бүгүнкү күндө болжол менен 14 миң км темир жол жана 15 миң км автомобиль маршруттарын түзөт. Алар Бирлике мүчө мамлекеттердин Европага, Кытайга, Иранга жана башка негизги өнөктөштөргө байланышын камсыздайт. Бул параметрлер ЕАЭБдин чоң инфраструктуралык потенциалын айкын көрсөтөт.

Транспорттук инфраструктураны өнүктүрүү жаңы технологияларды киргизүүгө, эл аралык сооданы чыңдоого жана БУУнун туруктуу өнүгүү максаттарын илгерилетүүгө шарт түзөрүн баса белгиледим.

Жыйынтыктап айтканда, натыйжалуу транспорттук чечимдерди иштеп чыгууга багытталган илимий-изилдөө иштерине инвестиция тартуу үчүн активдүү кызматташууга чакырдым", - деди Кожошев.